Ца Мунчаевхъал кулпатрава ххюя инсан хъунисса аьлимтал, элмурдал доктортал, профессортал, хIакинтал хьуну бур ва Аьрасатнал билаят хьхьичIунмай шавриву, хаснува элму хьхьичIуннай шавриву биялсса бутIа бивхьусса агьлу бур.
Декабрь зурул 17-нний Москавлив, Плехановлул цIанийсса Аьрасатнал экономикалул университетраву хьунни тарихрал элмурдал доктор, профессор, Аьрасатнал элмурдал лайкь хьусса ишккакку МахIаммадлул арс Мунчаев Шамиллул цIанийсса лахьхьин бай аудитория тIитIлатIисса шадлугъ.
П. Рамазанова
Ванал 1955 шинал Ломоносовлул цIанийсса МГУ-рал тарихрал факультет къуртал бувну бур, яла – аспирантура ва докторантура. 1956-1961 шиннардий зий ивкIун ур Дагъусттаннай элмийсса сотрудникну, 1964 шинал зун айивхьуну ур Москавлив, Плехановлул цIанийсса Халкьуннал хозяйствалул институтраву: ассистентнал къуллугърая тIайла хьуну, тарихрал кафедралул хъунаманал кIанттайн гьаз хьуннин. 1990-2010 шиннардий зий ивкIун ур Плехановкалул «Отечественная история» Элмийсса школалул хъунаману.
Цувагу вузирдансса, студентътурансса тамансса кьиматрайсса учебникирттал авторди, Лениннул ва ПаччахIлугърал премиярттал Комитетрал Тарихрал секциялул членну ивкIун ур, ацIниясса шиннардий ивкIун ур СССР-данул Министртурал советрал биялдарайсса ВАК-рал экспертътурал советравугу.
Шадлугърайн бавтIцириннахьхьун ссалам буллай, Плехановкалул ректор Виктор Гришиннул кIицI лавгуна университет хьхьичIунмай шавривугу, элмулул ва педагогикалул даву гьаз дувавривугу Шамил Мунчаевлул хъунмасса бутIа бивхьушиву.
«Жува хIакьину тIитIлай буру Плехановкалул цIа гьаз дуван хъунмасса захIмат бивхьусса инсаннал цIанийсса аудитория, Шамил МахIаммадовичлул элмийсса давурттив хIакьинусса кьинигу аьлимтурал ва студентътурал дянив сийлий дур», — увкуна ванал. Аьрасатнал Президентнал постпреднал къуллугъ чIумуйну бартбигьлагьисса ХIамзат ХIамзатовлул Дагъусттаннал БакIчи Владимир Васильевлул цIанияту барчаллагь увкуна университетрал хъуниминнахь, хъунасса аьлимчунал ва педагогнал цIанил аьпалул хIурматрайсса давурттив дуллалаврихлу. Виктор Гришиннул ва ХIамзат ХIамзатовлул профессорнал цIанийсса аудиториялул лента кьукьайхту, гихуннаймур мероприятие аудиториялуву дурна.
АрхIал зий бивкIми, даврил уртакьтал, дустал ва гъан-маччами, ца зумату кунма, чIурчIав дуллай бия Шамил Мунчаев тарихрал элму совет заманнайгу, тания махъгу лавайсса даражалийн гьаз дурминнавух ушиву, аьлимчу хIисаврайгу, тарбиячи-педагог хIисаврайгу ванал цIакьсса гьану бивзшиву сантирай ва лябукку буну кIулшиву дулаврил даву хьхьичIуннай хъит учин дуван. Университетрал хъуниминнайн ва коллективрайн Мунчаевхъал кулпатрал цIанияту барчаллагь тIисса ихтилат бувна ванал уссил, Аьрасатнал элмурдал академиялул член-корреспондент, тарихрал элмурдал доктор, профессор Рауф Мунчаевлул. Гьаннайсса, вава кулпатравасса цIанихсса профессорнал.
