Вай гьантрай ДР-лул культуралул министр Зарема Буттаевал кьамул бунни агьали.

Бадрижамал Аьлиева
[dropcap]В[/dropcap]а кьини министерствалийн увкIсса гьарцагу инсаннал аьрзирал, лаизаврил хIакъираву министрнал бунни хасъсса хIукмурду.
МахIарамккантуллал райондалийсса ТIагьирккант-Къаз­маляр шяраваллил искусст­валул школалул завуч Низами МахIаммадов увкIун ия цала школалун цIусса къатри дулара тIисса тавакъюращал. Ххю­ттурша оьрчI заназисса школа бусса къатри дусса дия лащин­сса тагьарданий. Зарема Буттаевал махъ буллунни ва масъала чулийн буккан баврицIун кабакьу буван, мукунма школалул материал-техникалул база авадан баврин кумаг буван.

«Иное-иное» группалул солист ва гьану бивзма Ислам Ибрагьимов увкIун ия министр­нахь цала группалул чIарав бацIира тIисса тавакъюращал. Ва группа сакин бувну бур 9 шинал хьхьичI. Ва бур цIанасса чIумал къачIявуну хьунабакьайсса журалул музыкалуха – этно-рокраха зузисса, халкьуннал аслийсса музыка уттизаманнул пурмалий ккаккан бавриха зузисса группа. ЦIанакул, масалдаран, группа зий бур АхIмадхан Абу-Бакардул произведенияр­ттайсса композицияртту чичавриха. Министрнал махъ буллунни чIарав бацIан, кабакьин.

Ва кьини ДР-лул культуралул министр мукунма хьунабавкьунни «Эридан» вокал группалущал, ххал бивгьунни группалул гастроллайн, гихуннайсса творчествалул планнайн багьайсса масъалартту.
Ахттиял райондалийсса Смугульский шяраваллил клубрал тагьарданиясса ихтилат бунни му шяраваллил советрал бакIчи Жумрид Исмяиловлущал.