Лакрал миллатрал «Илчи» кказитрай рирщусса Фазил Дашлайл хъинну захIмат бивхьуну цачIун дурсса Хъун дяъвилий ятIа-тIар бакъа ливчIсса вирттавраясса материаллу хъунмасса барчаллагьран лайкьсса дур.

На навагу, ссавур дакъа, ялугьлай уссияв, дуккавивав жула Кьубиялминнал цIардугу тIий. Бугьав «Илчилул» 37-мур номер кIунттил – дур кIия кьубиричунал цIа: Аьвдуразакьов Муса Аьвдуразакьлул арс ва Сурхаев Аьвдуллагь Сурхайл арс. КIиягу ххуйну кIулссия. Муса ттул буттал хъинирвил арсри, Аьвдуллагьгу ниттил ссурахъур.

---

На уттинингу тамансса чивчуссар «Илчилийгу», ттула лу­ттирайгу Хъун дяъвилул гьур­ттучитурая ва тикку бат хьуминная. Минная хIакьину цаягу ливчIун акъар. Фазил, вин хъунмасса барчаллагь ттула чулухатугу, жяматрал цIаниятугу. Му ина дуллалисса бигьа дакъа­сса, амма бусравсса ва аьркин­сса даву тихуннайгу щаллу дуван­сса цIуллушиву ва каши дулуннав вихьхьун!
Хъун дяъвилийн лавгсса 129-гу кьубиричунал лажин-цIагу, цивппагу, къушругу ттун кIулссия. Вайннаяту ятIа-тIар бакъа, оьттул майданнив ливчIссар 73. Махъунай кIура авссар хIакьину цаягу къаливчIсса 46 аьраличу.
Утти ца-кIива махъ учинна вай жула шяравасса кIиннаягу, цайва-цайва авцIуну.

Аьвдуразакьов Муса цIасса ятти-хIухчуя. Дяъвилул хьхьичI шиннардий зий уссия Гъумучиял колхозрай яттил бригадирну. Дяъви байбивхьу­сса гьантрай зана хьуссия бу­ттал шяравун. Мусан чан-кьансса чичин-буккингу лавхьхьуну бия, ликпунктрайн занай.
Ххувшаву ларсун 60 шин хъанахъисса 2005 шинал, тарихравунгу багьан, ттула луттирайнгу ласун тIий, цуманачIа ци дурив ккаклай, шяравух уклай усси­яв. Хаснува итталун багьан­ссагу бурхха куну, Аьвдуразакьхъал къушлийн увхссияв. Ша­ппа лявкъуна чIивимур ссу Аьйша. КIанил бусласаврийн бувну, хъунама уссу Муса лавгун ур дяъвилийн 1941 шинал ахирданий. Миккува Аьйшал бувсуна 1942 шинал шанмурцIу чагъар бувкIшиву, уссу ятIа-тIар бакъа бат хьунни тIисса. Яла Аьйшал ттул хьхьичI бивхьуна уссил цала хатIлий чивчусса, фронт­рая гьан бувсса чагъар, цуппагу хъахъи дарайлул рангирайнгу кIура бавсса. Вана кIа чагъар цуппагу, Мусал цалва чивчуну бивкIсса куццуй:
«Ххирасса ссуй, Аьйшай. На вил зяхIматрахун жула хъунив хьусса нину-ппугу, къатта-къушгу къабагьандав тIийяв икIайсса. Утти иш укун багьунди. Ттул вихь хъунбасса миннатри, миннал ялу бацIу. Миннан къа­ччан бикIан мабару. Иншаллагь, сагъну учIарча, зу бумургу хъама къабитанда. КъаучIарчагу, мигу зуйнма аманат хьундав, акъашивугу кIул мадару…».
На Аьйшащал хьунаавкьу­сса чIумал, нину-ппугу аьпалу­хьхьун лавгун бия, хъунмур ссугу къашавай шаний бия. КIава базилух Аьйшал ттухь бувсуна ятIа-тIар бакъа бат хьуссар тIисса чагъар бувкIшиву хушрай аьрайн лавгун ивкIсса комсомолец Аьвдуразакьов Юнуслул хIакъиравугу, къушлийгу чIанва-чIаваману ивкIсса.

ХIакьину Аьйшагу аьпалувух бивхьуну 5-6 шин хьуну дур. Аьвдуразакьхъал къаттагу эяллайн кIура бавну бур. Цала ххирасса хъунама ссурахъу Аьвдуразакьхъал Муса фронтрай ивкIусса хавар бияйхту, Къапкъазуллал зунттаву, Марухаллал лахъшиндарай талай ивкIсса Мадинахъал ХIажил 1943-ку шинал чивчуну бивкIссар укунсса ххаругу:

Буттал кIанттул цIаний,
намусрал цIаний,
Тархъаншиврул цIаний
жан дулун багьрив?
Дяъвилул майданнив,
вирттаврал дянив
Виричусса бивкIу
кьамул бан багьрив?

Буттахъал кьадиртсса
лакрал «гъазил» цIа,
Гъазаватрай увккун,
вин гьаз дан багьрив?
Шанашу, ссурахъуй,
нахIу шанаву,
ЗахIматкаш халкьуннал
барчаллагьралу!

Виричунал бивкIу
чувнал бивкIури,
Чувшиврий ивчIаву
бусравшивури!

[dropcap]Ф[/dropcap]азил Дашлайл кIул ув­сса кIилчинма кьубиричуну ур Сурхаев Аьвдуллагь. Зий ­уссия колхозрал бухгалтериялий. Дяъвилийнгу увцуну ивкIссар 1942 шинал ахирданий. Ппу Сурхай хIухчуя. Ни­ттийн Чачар учай­ссия. Къушлийгу бия кIия уссу ва кIива ссу. Ппу вай мюрщину бунува ахиратрал хьу­ссар. Аьвдуллагьлул хъунама уссу Аьлигу ванаяр хьхьичIва увцуну ивкIссар дяъвилийн. Чичин-буккингу къакIулсса, царагу элмулиягу хавар бакъасса Аьлигу ятIа-тIар бакъа бат хьунни тIисса чагъар бувкIссар.
Дяъвилул ххурххулувухгу ув­ккун, зана хьуну увкIун ивкIсса Манилавхъал МухIаммадлул та чIумалва бувсуна укунсса хавар:
— 1942 шинал, мартрал ахирданий, душманнал самолетирттал бичлачисса бомбардаха цичIар чIалай дакъая. Му ппур­ттуву махъунмай хьунсса амру бувкIун, бавчусса чIумал, ттула чулухунай ка галай дуллалисса солдат хIисав хьуну, анаварну левчуссияв ганачIан. На ганан кIул хьуну ияв. Га щала оьттувух увккун ия, мунияту ттун кIулгу къавхьуна. Ганал кьакьари бия ппив бувну, ихтилат бан хъанай акъая. КIиссурттайну бувчIин буллай, цахьвасса кьалан, ча­гъар бувккун, ганий чивчуна, гуж-хушрай: «Нагу кьубиричура, Сурхайхъал Аьвдуллагьра. Ппугу ччянива ивкIуссар. Ша­ппа нину ва 2 ссу буссар. Хъунама уссу Аьлигу фронтрай уссар. Инава ххассал хьуну, Кьубавнай уккарчангу, буси жулминнахьгу хьумур. Нагу ахирданийн ивну ура, на кьаита, виласса ба».

Дяъви къуртал хьуну махъ МухIаммад увкIссар шавайн. Мунаща му чагъаргу бакъа хьуну, къушлий цуппалу ливчIсса ссихьгу бусан къахъанай, на миннал гъанчушиву кIулну, ттухь бусан увкIуна Аьвдуллагьлун хьуну бивкIмур. Миккува ххигу бувна: «На бансса цамур бакъая, ххюрхху увну, чIаравсса ца къатIух Аьвдуллагьгу кьаивтун, ивчIангу-уккангу авчуссияв», — куну.
Аьвдуллагьлул ссихь, ХIавахь, на нава бувсъссия гьарца зат.
ХIакьину Сурхайхъал къушгу хъархъаллайн кIура бавну, мулкирал заллу хьунсса дунияллул чувгу къаливчIун, мечIакъатIрахьхьун лавгун бур.
Та дяъвилул дуржагьраву жанну дуллусса, ятIа-тIар бакъа бат хьусса цинявнналвагу аьпа абад хьуннав!

Оьмахан,
ш. Кьуби