Ххал бивгьунни агьалинаща даруртту ласун бюхъаврил, дарурттал ххуй-оьккишиврул ялув бацIаврил хIакъиравусса масъалартту.
БатIаву хьунни Санкт-Петербургуллал «Герофарм» тIисса заводрай.
БатIаврий махъ лахълай, Владимир Путиннул укун увкунни: «Инсантурал оьрмурду лахъи баву ва ххуй-хъин баву – му билаятрал хьхьичIуннайшиврул ца мурадри. Гьамин, ми масъалартту щаллу баву мурадрайри гьарца зат зун аьркинсса, дузал дуллан аьркинсса, миннуцIун — национал проектирттал программарттугу». Мунал тIимунийну, яла захIматми азарду цIанасса ппурттуву бюхълай бур хъин дуван, ттизаманнул технологияртту ишла дурну, му чулуха тамансса хьхьичIуннайшиву хьуну дур.
Яла АьФ-лул цIуллушиву дуруччаврил министр Вероника Скворцовал кутIану бувсунни 2025 шинайннин агьали дарурттал щаллу баврил стратегиялул 1-мур ятIапрал хIасиллал хIакъираву. Мунил бусаврийну, оьрмулун чара бакъа аьркинми дарурттахсса багьри личIлачIиссар заводрал буккан байнисса дарурттал багьрал даражалий.
БатIаврий ихтилат бунни ДР-лул БакIчи Владимир Васильевлул. Мунал дакIнийн бувтунни гьашину мартрай Дагъусттаннайн увкIун ивкIшиву Владимир Путин. Президент ветерантуращал хьунаавкьусса чIумал, мунал тапшур бувну бивкIссар дагъусттанлувтурансса арцу бюджетрава ссуссукьу дуллалисса къуллугъчитал къуллугъирттая мурахас бан. «Му даву жу дуллай буру, ихтиярду дуруччай органналгу жун кумаг буллай бур. ХIакьину жучIа сияхIрай бур 540 азара хIаллихшиннарду дусса инсан, миннан харж дан аьркинну дур 1 млрд. ва 280 млн. къурушрал», — увкунни В. Васильевлул. Мунал бувсунни республикалул министерстварттал ва ведомстварттал му ххуллий дуллалисса давурттая.
ДР-лул каялувчинал бувсунни мукунма закондалий дакъа инвалидшиву хьун дурминнаща му махъуннай зехлай бушиву, му даву дуллай бушиву медико-санитарный экспертизалул лагрулий. БатIаврий ихтилатру бунни мукунма цаймигу регионнал бакIчитурал.
