[dropcap]О[/dropcap]ктябрь зурул 25-нний МахIачкъалалив Оьруснал театрдануву шадлугърал даражалий кIицI ларгунни Дагъусттаннал хъаннил Союзран 25 шин там шаврил юбилей. ХIакьину Республикалул 55 муниципалитетирттай чялишсса давуртту дачин дурну, хьхьичIунну дур хъаннил Союзру. Вайннал кьюкьраву бур давривугу, оьрмулувугу хьхьичIун ливчусса яла бусравсса хъами.
Дагъусттаннал хъаннил юбилей барча дан республикалийн бувкIун бия Азирбижаннавасса, Къазахсттаннаясса, Москавлиясса, Ставропольлал крайраясса ва цаймигу регионнаясса бусравсса хъамал.
Шадлугърал мажлис тIитIлатIисса ихтилатру бунни ДР-лул цалчинма вице-премьер Анатолий Карибовлул, ДР-лул Халкьуннал Мажлисрал председательнал хъиривчу Камил Давдиевлул.
Цала ихтилатраву Анатолий Карибовлул кIицI лавгунни, республикалий яла захIматмий шиннардий хъаннил хъуннасса хъар ларсун диркIшиву.
— ЦIуссалакрал ва Бущихъиял райондалийн къачагътурал кьюкьри ххярхсса ппурттуву виртталсса, уздансса, буххаву къакIулсса жула ниттихъал, ссурваврал аьралитуран кумагру буллай буниялагу хъунмасса захIмат бивхьуссар. Тай шиннардий вайннал дурсса чувшивуртту тачIав хъама къаритантIиссар, — увкунни Анатолий Карибовлул.
Ванал мукунма дакIнийн бувтунни, ванияр 25 шинал хьхьичI Республикалий хъаннил Союзрал гьану бивзсса, чIярусса шиннардий каялувшиву дуллай бивкIсса Дагъусттаннал Халкьуннал шаэр, цинявппагу хъами-душвавран эбратну оьрму бувтсса Фазу Аьлиева.
Анатолий Карибовлул дурккунни Республикалул президент Владимир Васильевлул чулухасса барча баврил адресгу.
Хъирив, сахIналий ХIурматрал грамотартту дуллунни гьарица иширттаву чялишсса гьурттушинна дуллалисса Союзрал кьюкьравусса хъаннин. Наградартту дуллуминнавух бия Аьрасатнал Виричу МахIаммад НурбахIандовлул нину Кумсият НурбахIандова,ДР-лул Миллатирттал политикалул министр Татьяна Гамалей, политикалул элмурдал доктор, Аьрасатнал хъаннил Союзрал член Марзижат Буттаева, ДР-лул Культуралул министр Зарема Буттаева.
ЛичIинува кIицI лавгунни, цила оьрмулун нигьачIаву дусса тагьарданий, кIюрххилнин аьралуннащалсса дахIаву дуручлай бивкIсса Полина Халилова.
Дагъусттаннал хъаннил Союзрал председатель Интизар Мамутаевал барчаллагь увкунни цинявппа хъамаллурахь ва мажлис къуртал бунни машгьурсса шаэр Фазу Аьлиевал «Ккулла чув битарчангу, ниттил къюкIливух буккайссар…» тIисса мукъурттийну.
