Дурар ттигу шагьрулул циняв лахъ къатравун гъилишиву нани дан. Аьдатрайн бувну, ххюва гьантлул дянив гьавалул тагьар 8 градусраяр лахъсса духьурча,
хIукуматрахь дуссар ихтияр гъилишиву жула къатравун ва социал идарарттайн къадулунгу.
Ихтияр укунсса дунугу, гьашину МахIачкъалаллал къуллугъчитурал хIукму бувунни дяркъу хьуннинна оьрчIал садикру, школартту ва азарханарду гъилишиврул дузал бан. ХIасил, ноябрьданул 5-нния шиннай вай идарартту гъилину буссар. Ноябрьданул 10-нния гихуннай гъилишиву дулунтIиссар чIяру зивурду дусса къатравунгу.
Шиккува кIицI лаган, шагьрулул гъилишиву дулай система дакьин дурну, кIинтнийннин хIадурну дусса дур. Амма хIадурну дурив ягу дакъарив жува кIинттул ххал банну, мунияту ва ишираву къуллугъчитурайн щала вихшалагу къадишинну.
Коммунальщиктурал бусаврийну, ларгсса гъинттул ва ссуттил вайннал котельнайрду бакьин бувну, гъилишиву нанисса лахъисса манзиллайхсса бургъурду баххана бувну, канализациялул ва щинаххуллурдал системартту дакьин дурну, хъуннасса даву дурну дур. ХIасил, вайннал даврингу агьалинал багьайсса кьимат бищунссар кIинтнил замгьарданул гьантрай.
З. АьбдурахIманова
