Ттуршра шинал хьхьичI 1918 шинал ноябрь зурул 11-нний къуртал хьуссар Цалчин­сса дунияллул дяъви. Му дяъви хьуссар кIира хъунисса 

коалициялул — Антанталул билаятирттал (Аьрасат, Великобритания, Франция) ва Четверной союзрал (Германия, Австро-Венгрия, Османнал империя ва Болгария), дунияллул лагрулийсса данди бацIавуну. Бух хьуссар Германия ва миннал чул бувгьуми.

---

Франциянаву Компьен вацIлувусса Ретонд станциялий Антанталул ва Германнал делегациялул чирчуссар дакьаврил икьрал. Немецнан аьркинну бивкIссар кIира нюжмардул дянив тархъан дан цаппара аьрщи. Му бакъассагу, Рейн не­ххал урчIамур зуманив нейтрал зона дан, союзниктуран ярагъ ва транспорт дулун, циняв ясир бувгьуми тархъан бан.

Германнащалсса дакьав­рил икьралданул ахир тIалав­шиннарду аьч дурссар 1919 шинал июль зурул 28-нний Версаллал чIалъаьлуву хьусса Парижуллал дакьаврил конференциялий.
Инсаниятрал тарихраву хьхьичIва-хьхьичI кIива континентрал – Евразиянал ва Африканал аьрщарайх, мукунма хъунисса хьхьирирдал акваториярдайх ппив хьусса Цалчинсса дунияллул дяъви хьуссар ца яла хъунмамур ва оь экьи бувтIумур дяъвину. Дяъви наниссаксса хIаллай (28 июль 1914 – 11 ноябрь 1918 ш.) аьрайн бувцуну бивкIссар 38 билаятраясса 70 миллион инсантурал. Миннава ливтIуссар 9,5 миллион, 20 миллиондалия ливчусса инсантурайн щавурду дирссар, 3,5 миллион инсантурал муша­къат хьуссар. Яла хъунмасса зарал бивссар Германнал, Аьрасатнал, Франциянал, Австро-Венгриянал билаятирттан.

1942 шинал ноябрь зурул 19-нний байбивхьуссар операция «Уран». Сталинград шагьрулул чIарав хьуссар совет аьра­луннал гьужум. Ва кьини ракетардал аьралуннал ва артиллериялул кьинилун ккаллиссар.
Операция «Уран» байбивхьуну бивкIссар архIала шанна фронтрай.
Авиация ишла дан хъанай къабивкIссар гужсса ттурлу ду­ну. Мунияту жула аьралуннан ххуллу буклай бивкIссар артиллерия.
КIюрххил ссят 7.30 минутI хьусса чIумал душманнан бав­ссар бусалдаравун дагьсса «катюшардал» цалчинсса битавуртту. Башттан цичIар къачIалачIисса шартIирдай ппив дуллай байбивхьуссар немецнал оборона.

«Катюшардал» цIу тIиртIуну диркIссар ссятраяр ххишаласса хIаллай. Яла душманнал позициярдайн гьужум бувссар 5-мур танкирдал ва 21-мур армиялул битултрал дивизиярттал, миннал хъирив бахьттагьалтрал. Гьужумрай бавчуссар Доннал фронт­рал аьралгу.
Агьаммур рищаву душманнайх дурссар 65-мур армиялул битултрал дивизиярдал. Най диркIссар къизгъинсса талатавуртту. Так ссят 14.00 хьусса чIумал бювхъуссар жула аьралуннаща душманнал позицияр­тту биту-ххиту бан. Ва ххувшаврийн хъар хьуссар гихунмай­сса дяъвилул тагьар Совет аьрал хьхьичIунмай хъанай бавчуссар, ва гихунмай ххит бувссар Паулюслул аьрал.

ХIадур бувссар
А. Аьбдуллаевал
***
1904 шинал ноябрь зурул 26-нний Порт-Артур къала буручлачисса Оьруснал аьралуннаща бювхъуссар гьужум бувну нанисса японнал аьрал бацIан бан. Ваниннин хьхьичI баргъбуккавал чулухсса укреплениярттайн бувсса гьужумрая цичIав къабувчIукун, японнал кьюкьлуй каялувшиву дуллалисса генерал Нокомуран пикри хьуссар Курганнал батареялийн гьужум бан. КIира ссят ва дачIиннуй бакъацIавай ккуллардал цIу тIиртIуну диркIссар душманнал Курганнал батарея бусса кIанайн. Душманнал аьрал гъан хьуссар батареялучIан хьхьувай щинчIав ххал къахьунну. Амма прожекторданул чаннал ми ашкара бувссар. Къалалул артиллериялул тIиртIуссар цIу. Ккуллардал гъаравух японнал аьрал къалалувун бувххун бавчуссар. Так му чIумал Курганнайн леххаву руртссар, инсантал цала-цала позициярдай бацIаннин, японнал ярагъ бувгьуссар. Ца ярагъунничIасса дежурныйнан ми ххал хьуну, «япон» куну вев увкуссар, амма му душманнал къуннагъ рирщуну увтссар. Дежурныйнал, кIулшилия гьаннин, пушкалул ххал кIункIу дурну, битан бувссар. Сагъну ливчIсса ярагъуннива душманнайн битлан бивкIссар къалалувуми. Канихь бусса ярагъ ишла буллай бивкIссар, амма японнал аьрал ялу-ялун ххишала хъанай бивкIссар.
Къалалувуминнайн гуж багьлан бивкIссар. Му ппурттуву резерврайсса моряктурал рота хIала дурххун, душман кьатIув ивхьуссар.

Нокомурал ппив-ххив хьусса аьрал бавтIун, цIунилгу гьужумрай бачин бувссар. Мунан хIисав къархьуссар къинттуллуха лирчусса моряктурал десантрал ротарду. 500 матрос ххявххун, Нокомурал аьралитал, ццахханну руртун, лихълахъи бувссар. Укун къуртал хьуссар къалалийнсса душманнал мукьилчинсса гьужум.
Ва кьини душманнал аьрал 4500-ннийн бивсса саллатIнацIа хьуссар.
Оьруснал аьралуннавагу чIявусса ливтIуссар. Цаппара ротарду щаллуну духларгссар, 25-мур полкрал 3-мур роталуву щавурду дирсса командиргу, шама цаймигу ливчIун бивкIссар. Ва кьини 417 морякнал жан дуллуссар.