Ххамискьини, октябрь зурул 18-нний, МахIачкъалалив «Аьрасат – ттул тарих» музейраву хьунни Регионнал дянивсса коммерциялул дакъасса идарарттал цалчинсса конгресс.
Конгрессрал даврил сакиншинначину хьунни ДР-лул Национал политикалул министерство.
Имара Саидова
Шикку гьуртту хьунни Ухссавнил Ккавкказуллал ва Кьилвалул федерал округирттал коммерциялул идарарттал вакилтал, Ингушетиянал, Къабардин-Балкьарнал, Чачаннал, Ухссавнил АьсатIин-Аланиянал республикарттаясса, Ставрополлал, Ашттарханнал, Краснодардал крайраясса, Волгоградуллал областьраясса, Москавлиясса идарарттал хьхьичIунсса экспертътал ва пишакартал.
Конгрессрал даву дайдирхьунни ва хъамал барча бунни ДР-лул ХIукуматрал председательнал буржру чIумуйну биттур буллалисса Рамазан Жяъпаровлул ва ДР-лул Халкьуннал Мажлисрал председательнал хъиривчу Камил Давдиевлул.
— Цалчинни жула республикалий укунсса агьамсса батIаву дуллалисса. Махъсса ппурттуву билаятрай хъуннасса къулагъасрайн лавсун бур идарарттал даву хьхьичIуннай ва чялиш дуккан даврил масъалартту. Властьрал органнащал чялишсса хIала-гьурттушиврийнур къулай хьунтIисса инсантурал оьрму ва хIукуматрал ахIвал-хIал. Агьамсса иширан ккалли бан бучIиссар ва конгрессрал даврин кьимат бищун Аьрасатнал яла хьхьичIунми пишакартал ва экспертътал бучIавугу, — увкунни Рамазан Жяъпаровлул.
Конгрессрал даврил хъунмур мурадну хъанай бия цинявппа гьуртту хъанахъиминнал дянив хIала-гьурттуну зунсса мюнпатсса чаранну лякъаву.
Хьунни ххуй-ххуйсса ихтилатру, давривух районнайсса агьали хIала буххан баву мурадрай, ккавккунни мюнпатсса маслихIатру.
Шиккува кIицI лаганну, 3000-нния лирчусса НКО-рду дусса республикалий чIяруми МахIачкъалалив душиву ва му тагьар даххана дан багьлай бушиву.
Рамазан Жяъпаровлул кIицI лавгунни Дагъусттаннай чялишну зий душиву «Ятинтал бакъасса Дагъусттан» ва «Солдатътурал ниттихъал комитет» тIисса хъаннил жяматийсса суккушиннарду.
Жяматийсса пикрирду ахттар буллалисса Щалагу Аьрасатнал элмийсса центрданул советрал председательнал хъиривчу Иосиф Дискиннул барчаллагь увкунни укун ххаллилсса мероприятиялийн цайнма оьвчаврихлу. Ванал цала ихтилатраву кIицI лавгунни АьФ-лул Президентнал ккаккан бувсса Майрайсса хIукмурду биттур баву яла хьхьичIунмур мурадну бушиву.
Пленарсса батIаврил лагрулий ихтилат бунни Аьрасатнал Миллатирттал дянивсса НКО-рдал союзрал президент Александр Айгистовлул.
Конгрессрай мукунма гьаз бунни паччахIлугърал органнал ва граждан институтирттал дянивсса дахIаву цIакь даву мурадрайсса масъалартту.
Шиккува кIицI лаган, Регионнал дянивсса коммерциялул дакъасса идарарттал конгресс хьунни «Аьрасатнал Федерациялий ПаччахIлугърал миллатирттал политика иширайну дачин даву» тIисса Федерал программалул лагрулий.
