Хъусращатусса Заира Маммаевал (ряхра шинавусса ванил душ София къашавай хьуну бур шин ва урчIва зуруву) ва Шалиятусса Анжела Маммадаевал (ацIния шанна шинавусса ванил арс ХIажи къашай хьуну ур шанна шинал хьхьичI) сакин бувну бур
ватсаправу диабетрал къашавайсса оьрчIал ниттихъал группа – «Диа-семья», цивунгу духлай дур 73 нину.
[dropcap]З[/dropcap]аирал бусаврийн бувну, вай куннищал кув кIул хьуну бур МахIачкъалаливсса Дагъусттаннал оьрчIал многопрофилсса азарханалий, Эндокринологиялул центрданий ччя-ччяни хьунабакьлай. «Диа-семья» архIал ляхълай бур му азарданущал талансса чаранну, кувннал чIарав кув бацIлай бур.
Ттигъанну щалагу дунияллий кIицI лагайсса Диабетрал къашавайминнал кьинилун хасну, Заирал ва Анжелал «Звездный» тIисса кулпатрал клубраву сакин дурунни оьрчIансса байран.
[dropcap]М[/dropcap]унинсса спонсорталгу лявкъуну бия Заирал цила мачча-гъаннал дянив: уссу Аьлиев Халил, Норильск шагьрулий цува заллусса стоматологиялул клиника бусса; ссурахъал — Хан ва Аьвдурашид Рамазановхъул, Майкоп шагьрулий цала стоматологиялул клиника бусса; МахIачкъала шагьрулийсса «Сирона» стоматологиялул клиникалул хъунама Кьурбан Халидов. Вай цинявппа бур Щардал шяраватусса жагьилтал.
[dropcap]Б[/dropcap]айрандалий гьуртту хьунни оьрчIал эндокринологиялул отделениялул хъунмур Ирина Кострова; адвокат, «Монитор пациента» тIисса идаралул хъунама Зиябуттин Увайсов, спонсортурал чулухасса вакилтал Гулбагьар ва Эльвира Рамазановахъул, Ххадижат Шихаьлиева.
Заирал барчаллагь увкунни оьрчIан байран дан кабакьу бувминнахь, къашавайсса оьрчIан уква даруртту тIалав бан юрист зумунусса кумаг байсса Зиябуттин Увайсовлухь ва оьрчIал эндокринологиялул центрданул отделениялул зузала Ирина Костровахь.
Ца мутталийсса духьурчагу, оьрчIан цIуцIаву хъамаритан дансса тяхъасса прорамма хIадур дурну дия клубрал зузалтрал.
