[dropcap]Н[/dropcap]оябрьданул 1-нний Каспийскаллал Централ библиотекалийгу хьунни «Искусствалул хьхьу», халкьуннал Цашиврул кьинилун хасну.
Мунил сакиншинначиталну бия Ф. Аьлиевал цIанийсса ЦБС, чIарав бацIаву дурну дия С. Агъабабовлул цIанийсса Каспийскаллал искусствалул школалул ва ОьрчIал художествалул школалул.
[dropcap]В[/dropcap]а ххуллухсса хьунабакьаву хас дурну дия, билаятрал цашиву дуручлай, Ватандалийн ххявхсса чапхунчитурайнсса данди бацIавриву ццах бакъашиву ккаккан дурсса дагъусттанлувтуран, «Абадлий бюхттул дурсса чувшиву» тIисса цIанилу.
Хьунабакьаврийнсса программа хIадур дурну дия Аьрасатнал Виричу М. НурбахIандовлул цIанийсса Жагьилсса патриотнал «Буттал кIану» цIанилусса клубрал, цувгу тIивтIусса «Аьрасатнал ниттихъул» суккушиндарацIун.
[dropcap]В[/dropcap]а давривух гьуртту хьунни Каспийскаллал шагьрулул школарттал дуклаки оьрчIру, Полициялул колледжрал студентътал, «Молодая Гвардия «Единой России» организациялул члентал. БатIавривух гьуртту хьун бувкIун бия ЦIуссалакрал райондалийсса ТIюхчардал шяравасса «ЧIава давдиевхъул» ва ТIюхчардал дянивмур даражалул школалул директор ШайхахIмад Дадаев. Мукунма 1999 шиналсса аьрали иширттаву ЦIуссалакрал райондалий ватандалухлу цалла жан дуллусса виричу, Къучагъшиврул ордендалул кавалер АхIмад Давдиевлул гъан-маччами, Авгъаннал дяъвилул гьурттучитал МахIаммад Хадулаев ва ХIасан МахIаммадрасулов, «Сталин» цIанилусса политикалул организациялул каялувчи Ися Аьзиев ва чIявусса цаймигу.
[dropcap]И[/dropcap]хтилатру бувна «Матери России» суккушиндарал кIанттул отделениялул председатель, Каспийскаллал депутатътурал мажлисрал депутат Таиса МахIаммадовал, шагьрулул администрациялул Культуралул иширттал, жагьилтурал политикалул, туризмалул ва спортрал управлениялул начальник Мурад МахIаммадовлул, Авгъаннал дяъвилул ва Ухссавнил АьсатIиннавусса иширттал ветерантурал.
ШайхахIмад Дадаевлул цалвамур ихтилатраву бувсуна АхIмад Давдиевлул виричусса оьрмулия. Мунал цIа гьашину дуллуссар ТIюхчардал школалун. АхIмад Давдиевлул ссил Тамари Исяевал барчаллагь увкуна цила уссиясса аьпалухлу.
Махъа нанисса ник ватан ххирану тарбия давриву дуллалисса хъуннасса даврихлу ШайхахIмад Дадаевлун, Роза Аьбдуллаеван ва ХIасан ХIусайновлун «Аьрасатнал ниттихъул» суккушиндарал чулухасса хIурматрал грамотарттугу дуллуна.
ХIадур бувссар
Бадрижамал Аьлиевал
