«Илчилул» № 39 номерданий дуккарду жура Шалласу Шалласуевлул чирчусса агьамсса макьала, ванал цала тIийкун, «дакI-ттиликI цIий чирчусса»,
лак Лаккуя ЦIуссалаккуйн бизан баврил хIакъиравусса. Ва дур, цимил аьч дулларчангу, чунчу къаучин (тарих чулу хьун къабюхъайссар!) аьркинсса тема.
Мина кьаритан багьсса ппухълуннал аьпа учаванмагу ми шяраваллурду диркIсса кIанттай, Шалласу Шалласуевлул тIийкун, чIири-хъунсса гьайкал хIисаврайсса чару бацIан буван захIматсса иш бакъархха. Лавгмунил хIурмат баву тачIавгу къаххуйшивуну ва къабучIину къадиркIссар. ЧантI увкусса миллатрал цалва тарих аякьалий ва хIурматрай ябувайсса бакъарив?
ПатIимат Рамазанова
Лакран 1944 шин къиялул, аькьувалул ва дардирдал дайдихьуну хьушиву му хIакьину жунма цинявннанмагу исватну чIалачIисса зат бур. Дяъвилул цIараву кунна, 24 шяравалу лекьа-пIякьу шаврияр, 1600 вилах лещаврияр кьурчIисса ци бикIайссар миллатрал тарихраву? Изан увсса ряхазара инсанная шанна шинавун кIиазарунничIан бивсса ливтIуну бур. Зулмулий бизан барчагу, хушрай бизарчагу, укунсса кьини дурккун дур. Тания махъгу, агьали цивппа шагьрурдайн бизлай, диялну ххялтIа дурккун дур лакрал щархъурду. Лакку кIану ххялтIа буккаврицIун зунттал халкьуннал бучIантIимуний дакI цIуцIаву дурагу дакъасса хIукуматрал политикалулгу кабакьу бувссар. Мяйжанссар, цивппа бивзминнал хъусгу, зий-захIмат буллай лявкъумургу зиялий ратIух къаларгссар, шагьрурдай ччими шагьрурдай кIанттул хьуссар. Амма ттул ихтилат хIакьину цамунияр – Шалласу Шалласуевлул лак Лаккуя бизан бувну 75 шин шаврицIун дархIуну дуван маслихIат буллалисса давурттал сияхIрай дакI дакьавриятур. Шалласу Рамазанович ур дизан дурну диркIсса гьарца шяраваллицI (шяравалу диркIсса кIанттуцI) хъамакъабитулунсса гьайкал (памятная стела) дацIан дан маслихIат буллай.
Ва даву дуван аьркиншиврул барашин хIисаврай, кIицI лаганну сентябрь зурул 27-нний «Илчилий» рирщусса «Щавщилул мурхьирдал ябуллалисса Арттаби» тIисса ХI. ХIусайновлул макьалалувасса ва парчагу: «Ивунав на зунттул яла лахъмур бурхIайн. Амма чувчIав шяравалу диркIсса куннасса аьш чIалай дакъая. БакIъялавай, ччех къаикIанну, хIурхIа най, ивра на хIалличIан. Цакуну ттул чурххавун муксса ххаришиву дурххунахха, на, ттунна Арттабиял шяравалу ляркъуну тIий, унийва урттувугу щяивкIун, аьтIун ивкIссияв. Ттул иттату нанисса макьгу, явара, кьурчIисса дакъаяча, нацIусса дия. На ттулла лажин, жипливу дишай каршух къалирхьуну, чIаравсса улклул чIапIух лирхьуссия».
Школалий дуклакисса чIумал, ваниннин зувиллий ххюра шинал хьхьичI, лавгссияв жугу классращал экскурсиялий чIаххуврайсса Оьллаурттиял ва Тукъатуллал шяраваллавун. Таний жул шяраву эяллу нажагьсса дакъа дакъая, мунияту, эяллайн дурксса шяраваллал кIичIирттавух буклакийни, дакIнийри, шяравусса пахъдагьрулия нигьавххуну жува шаппайгума анавар бувксса. ДакIнийри, Арттабиял шяравалу ляркъусса ХIажимурад кунма, жулва цаппара душругу, цIувцIу чарил архитектуралийгу тамаша буллай, къащилул аьтIий бивкIссагу. Таний я ттун, я чIун архIалминнан ххуйну бувчIлайвагу бакъахьунссия ппухълу занай бивкIсса аьрщарацIа хьусса агьулданул кьадарданул аьсившиву. ЯхI-къириятрацIун, аьпалул ва аманатрал кьадрулуцIун бавхIуну пикри бувансса аькьлугу жул бакъахьунссия, аьтIийрив буссияв, ххуйнувагу дакIний бакъар циван аьтIий бивкIссарив. Жун цIарай нувщи шахьансса дувссилул тIясгума лявкъуна. Утти бура, цуксса ххари хьунавав кIийсса ттатта-бавахъал рухIру, шяраву пуркIу буккайхту тIий. ХIакьину оьрчIахь ва жагьилтурахь цIуххирча ЦIувкIуллал лагма-ялттусса шяраваллурду дусса кIанттурду, миннан кIулну бикIан ххай бакъара.
Мина кьаритан багьсса ппухълуннал аьпа учаванмагу ми шяраваллурду диркIсса кIанттай, Шалласу Шалласуевлул тIийкун, чIири-хъунсса гьайкал хIисаврайсса чару бацIан буван захIматсса иш бакъархха. Лавгмунил хIурмат баву тачIавгу къаххуйшивуну ва къабучIину къадиркIссар. ЧантI увкусса миллатрал цалва тарих аякьалий ва хIурматрай ябувайсса бакъарив?
