Республикалул Кардиологиялул центрданул чIарах нанисса МахIачкъалаллал кIичIираваллин дуллунни Хайру­ттин ХIажиевлул цIа.

Ноябрь зурул 13-нний увссар цIанихсса аьлимчу, медициналул элмурдал доктор, профессор, жяматийсса ишккакку Хайруттин Апанниевич ХIажиев. Нажагьсса бухьунссар ванал цIа къабавсса, къакIулсса.

---

Андриана Аьбдуллаева
Дагъусттаннал медицина хьхьи­чIуннай дан Хайруттин Апанниевичлул бивхьусса захIматран багьа бищун къашайссар. На мудангу махIаттал хъанан бикIара тай шиннардий, утти кунна, луттирдал, оборудованиялул дузалшинна дакъасса школартту къуртал був­сса оьрчIал хIарачатрай, бюхъу-бажарданий. НахIакьдан къаучайхьунссар лахьхьин ччинахун цичIар къадахчайссар куну.

МарцIну ххювардай школагу къуртал бувну, Хайруттин ув­ххун ур Дагъусттаннал медициналул институтравун. 1941 шинал мугу лавайсса кьиматирттай бувккуну, зун ивкIун ур участок­рал хIакинну, Ккуллал райондалул цIуллу-сагъшиву дуруччаврил отделданул хъунаману ва Ккуллал азарханалул хъунама хIакинну. Ва ивкIун ур терапевтгу, педиатргу, акушергу. Ца-ца чIунну шайсса диркIун дур щаллусса кьини балчаннуя къаливксса. Ванал навтлил чирахърал чаннай операциярттугу байсса бивкIун бур, оьрчIру буллалисса хъаннилссагу байсса бивкIун бур. Хайруттин Апанниевич зузи­сса шиннардий Ккуллал райондалул жяматран хъунмасса медициналул кумаг хьуну бур.

1946 шинал Хайруттин Апанниевич увххун ур СССР-данул Медициналул элмурдал академиялул терапиялул институтрал аспирантуралувун. Дагъусттаннайн зана хьуну махъ ва зун ивкIун ур Да­гъусттаннал медициналул институтрал госпитальнай терапиялул кафедралул доцентну. Ца-кIира шинава ивтун ур вава кафедралул каялувчину.
Хайруттин Апанниевич чIяру­сса нигьачIаву дусса азардан чаран лявкъусса аьлимчу хъанахъиссар.

Ванал цалалу ва цайминнащал архIал чирчуну дур 200-ннийн дирсса элмийсса давуртту. Хайруттин Апанниевич хъанахъи­ссар Дагъусттаннал терапевтътурал школалул гьану бивзману, цувагу каялувшиву дуллай ивкIссар ва школалий 50-нния лирчусса шиннардий. «Дагъусттаннал халкьуннал хIакин» тIисса бусравсса цIа Дагъусттаннай цалчин вананни дуллусса.
Хайруттиннул уссу ХIажи хъирив увккун, республикалул Кардиологиялул центрданул чIарах нанисса МахIачкъалаллал кIичIираваллин дуллунни Хайру­ттин ХIажиевлул цIа.

Укун дакIнийн утлай бур Хайруттин ва кIулну бивкIми.

Сулайман Маммаев, Дагъус­ттаннал медициналул университет­рал ректор, медициналул элмурдал доктор, профессор:
-Хайруттин Апанниевичлул ттухь дарс къадирхьуссар. На дук­лакисса чIумал, жул кафедрарду личIисса бия. Амма ттухь дарс дирхьуссар Хайруттин Апанниевичлул каялувшиндаралу кандидатътурал, доктортурал диссертацияртту дурурччусса ванал учениктурал: Эседовлул, Хасаевлул, Шамовлул.
Хайруттин Апанниевичлуя гъалгъа тIий, хьхьичIра-хьхьичI кIицI дан ччива мунал даврил кьяйда – лавайсса даражалий, гьар­та-гьарзану, гьарзат кIул бувну, бавтIсса, щаллу бувсса азарданул история. Таний, компьютерданул диагностика, гужсса лабораториялул анализру дансса шартIру дакъасса шиннардий, мукун балжину щаллу бувсса къашайшалал историялия хъунмасса кумаг хъанай бивкIссар. Муних бурувгун 90%-рал тIайласса диагноз дишин хъанай диркIссар.

Хайруттин ХIажиевлучIату Москавлив бувкIсса къашайшалт­рахь учайсса бивкIун бур: «Хайруттин Апанниевич урувгхьурча, шихун бучIан аьркиншиву къадиркIссар», — куну.
Хайруттин ХIажиевлущалсса хIала-гьурттушиву ттул дайдирхьу­ссар 2002 шинал, Москавлия докторнал диссертациягу дурур­ччуну увкIсса чIумал. Таний на чялишну зий уссияв ванал каялувшиндаралу­сса Даг­ъусттаннал терапевтътурал элмийсса обществалуву. На айивхьуссияв чIумуха лархьхьусса цIушиннарду дуллай, технологияртту ишла дуллай, Москавливсса ттула дустураягу кумаг бия ттун. Хайруттин Апанниевичлун на дуллалимуний дакI даркьуна. Му цувагу, оьрмулух къаурувгун, цIумур ахттар дан, лахьхьин гъира бусса, чIумуха лавхьхьуну зун ччисса ия. Оьрмулул 70 шин хьуну махъ лахьлан ивкIуна ингилис маз, компьютерду. Мудангу хьхьичIунай нани­сса ия. КIулшивурттахсса гъира, гьавас цайминнавунгу бутлати­сса ия.

Жу архIал жула школалул даража гьаз бансса чаранну ляхълай зун бивкIру. ХьхьичIра-хьхьичI жу дуллан бивкIру видеоконференцияр­тту. Миннуя хъунмасса кумаг, мюнпат хъанай бия, цанчирча чIявуми хIакинтурал сант дакъая республикалул кьатIув занансса.
2010-ку шинал Хайруттин Апанниевичлул на ивтунав Да­гъусттаннал терапевтътурал элмийсса обществалул председательну. Тания шихунай, хIакьинусса кьинигу, на муний каялувшиву дуллай ура.
Жул университетраву Терапевтътурал обществалул ва Хайруттин Апанниевичлул каялувшиву дуллай ивкIсса кафедралул сипталий аьдатравун дуртун дуссар «Гаджиевские чтения».

Хайруттин Апанниевич дакI­нийн утлай, букъавсун къа­бучIир, му хъинну уздансса хасиятгу, инсаншивугу дусса хIакин ивкIшиву. Къашайшалал кашилух, даражалух къаурувгун, гьарица инсаннан аьркинсса кумаг байва. Къашайшалал канивун урувгсса акъаяча, цала даву лавай­сса даражалий дуллалисса ия.
Хайруттин Апанниевичлул каялувшиву дуллалисса госпитальная терапиялул кафедра хьуссар институтрансса лавайсса даражалул кадрарду хIадур буллалисса кюруну.

ХIажи ХIажиев, медициналул элмурдал доктор, профессор, Хайруттиннул уссу:
— Ттун буттал лажин къа­ккарк­ссар. Му ивкIуну ур на дунияллийн уккан мукьва зурул хьхьичI. Ттун буттал кIану бувгьуссар хъунама ­уссил Хайруттиннул. Ва ттуяр 18 шинал хъуна­сса ия. ОьрчI заманнай на Лаккуй икIайссияв, уссу Азирбижаннаву зий икIайва. Му чIумал га ттун ккавагу-къаккаккайва. Яла, Хайруттин Ккуллал райондалий зун увкIсса чIумалла, на ттула уссищал гъанну кIул хьу­ссагума. На хIакин хьуссагу уссу сававнура. Ттунма хIакин хьун­сса пикри бакъассия. На дуклаки­сса МахIачкъалаллал 5-мур школалий ия ххаллилсса историк – Амри Шихсаидов. Ганал муксса ххуйну дарс дишайвахха, на историялух эшкьи хьуну ивкIра. Москавуллал университетравун уххан ччай уссияв. Амма ттун ми­кку тIайлабацIу къавхьуна. Дуниял леркьсса куна ура. Чун-унугу даврийн уххан ччай ура.

Му чIумалгу уссу ттул чIарав авцIуна. Мунал кумаграйхчIин увх­ра Элмурдал академиялул Да­гъусттаннал филиалданул лабораториялуву зун, Хайруттин ия ттухь, зун ухханнингу, зун ивкIун махъгу, хIакиннал пиша лахьхьи, медициналул институтравун ухху тIий, маслихIат буллай. Мукун увх­ссара на Дагъусттаннал медициналул институтрал лечебный факультетрайн.

УссицIа ттун давривугу, оьрмулувугу чIявусса затру лавхьхьуссар. Жу бияв даврия нигьа къабусайсса, захIмат буллай аьдатсса оьрчIру. Тай дия инсан цала захIматрайну гьаз хъанахъисса чIунну. Хайру­ттингу цала захIматрал, цала цува увсса инсанни. Ттун къадакIнийри га даву къуртал хьуну махъ кафе-рестораннавун, чун-унугу игьалаган занай. Мудан зий икIайва, ккалай икIайва, чIалну уттуишайва.
Мудангу уссу эбратну ивкIссар ттун, ганаха лавхьхьуну зунгу ччан бикIай.

Рита Мурачуева, ДР-лул ЦIул­лу-сагъшиву дуруччаврил министерствалул хъунмур эксперт:
— Хайруттин Апанниевич ХIа­жиев ия хьхьичIунсса хIакин ва ххаллилсса клиницист. Му ия Заннала хIакинну ляхъан увсса инсан.
Бюхттулсса даражалийн лавхъсса чIумалгу, ялагу кIулшивуртту ласлан, куртI дуллан ччисса, ду­ккаврихсса гъира-гьавас тачIавгу къалевшсса инсан, ххаллилсса лек­тор.
Хайруттин ХIажиевлул цIанилу итабавкьуссар цIанагу хъинну ишласса луттирду ва методикалул пособияртту. Ва ия инсаннал ххуй-ххуйми хасиятру цачIун дурсса, инсаншиврул ва бюхъулул бутIа ххишалану буллусса хIакин. Ва хьуссар медициналул ххуллийх наниминнансса бюхттулсса эбратну.