ДачIи шин ххишалагу хьунни «Альтус» тIисса анимациялул студиялий гьунар бусса жула жагьилтал «Усттартурал щар» тIисса мультфильмраха зий.

З. АьбдурахIманова
[dropcap]В[/dropcap]ай гьантрай хьусса видеоконференциялий мультфиль­рал цалчинмур серия ккаккан бювхъунни жулла республикалул ва Къабардин-Балкьарнал журналистътураща.
«Альтус-ГРУПП» студиялул каялувчи Руслан Салимгареевлул бусаврийну, мультфильм вайннал ларсун дур Аьрасатнал Президентнал граждан общество хьхьичIуннай даврин итадаркьусса грант духхаврийну.

Проектрал агьаммур мурадгу бур ялун нанисса никирал яла мюрщиминнал дянив жула тарих, культура, аьдат-эбадатру, зунттал халкьуннал багьу-бизу машгьур баву, жула лавгмуния мюрщултран бувчIинсса мазрай бусаву.
— Сайки 5 шин хъанай дур ва проектраха зунсса пикри-хиял жуву лявхъуну. Мульт­фильмран дирзсса «Усттартурал щар» тIисса цIагу жула Дагъусттаннайсса халкьуннал дуцири касмурду цачIун дур­сса мяъналийссар. Мультфильмрал агьамма герой цакуну агьантIиссар зунттал дянив дирхьусса хьхьичIарасса шяравун, гикку ганан лякъинтIиссар цанмасса дустал, кIул хьунтIиссар шяраваллил халкьуннал оьр­мурдащал, гайннал багьу-би­зулущал. ХIасил жула мюрщи тамашачитуран хъинну хIаз бизансса, чIявусса цIусса затру кIул хьунтIиссар, — тIий ур Руслан.

Ванал кIицI бувунни мультфильм 2D форматрайсса дуршиву.
Видеоконференциялий хьу­сса ихтилатирттаву Къабардин-Балкьарнал журналистътуралгу умуд бивхьунни проектрал тематика аьмну щалагу Ухссавнил Ккавкказуллал миллатир­ттан, хаснува цалла республикалул оьрчIангу, гъансса духьувкун, цачIарагу ва мультфильм кка­ккан даншиврийн.
Мультфильмрал проектраха зузиминнал лавсун бур ХIамзат ЦIадассал, АхIмадхан Абу-Ба­кардул ва цаймигу дагъусттаннал чичултрал хаварду. Мукунма ишла бувну бур Зунттал билаятраясса личIи-личIисса бусаларду ва магьри. Гьарца цIусса сериялуву буслай бур Ккавкказуллал халкьуннал аьдатирттая, касмурдая ва авадансса тарихрал ирсирая.
Цалсса мультфильмрал ца­ппара серияртту хIадурну дусса дур. Гихунмай проектрал автортал мультфильм дагъусттаннал 5 миллатрал мазрайн таржума дансса пикрилий бур.