[dropcap]М[/dropcap]ариян Дандамаевал цIанийсса Гъумучиял магьирлугърал школалул дуклаки оьрчIру гьарца шинал хьхьичIунну гьур­тту шай «Ттул ужагъ Дагъусттанни» тIисса аьдатсса Республикалул кIулшиву дулаврил министерствалул конкурсрай. Ттигъанну Буйнакскалий хьусса арулла райондалул дянивсса конкурсрай гьуртту хьусса шаннагу ансамбльданул бувгьунни хьхьичIунсса кIанттурду.

---

Зулайхат Тахакьаева
[dropcap]М[/dropcap]иллатирттал инструментирттай руцаврил номенациялий «ЧIава музыкантътурал» ансамбльданул бувгьунни шамилчинмур кIану. (каялувчитал — Сулайманов Амир, Мудунов Карин ва МахIаммадов ХIасан-ХIусайн). Халкьуннал балайлул номинациялий «Лакку билаят» ансамбльданул бувгьунни цалчинмур кIану (каялувчи ХIусманов Султан). Халкьуннал къавтIаврил номенациялий «Гъази-Гъумучи» къавтIаврил ансамбльданул бувгьунни цалчинмур кIану (каялувчи Мудунова Шагьризада).

[dropcap]В[/dropcap]ай гьантрай тIурча, къав­тIалтрал ансамбль ххув хьунни ацIра зоналул дянив хьу­сса республикалул конкурсрайгу.Вайннал ккаккан дурунни «Шярлу» тIисса Жамалуттин Муслимовлул къавтIаву. Ши­ккува кIицI бан, махъсса шиннардийсса конкурсирттай «Гъази-Гъумучи» ансамбль лув-ялув гьарца шинал ххув шайссар. Сакиншинначитурал лавайсса кьиматрай кIицI лавгунни Гъумучиял магьирлугърал школа, гьарца шинал гьарца номинациялий хьхьичIунну гьуртту шаврихлу.

Конкурсрал жюрилул хъунама, яруссаннал композитор АхIмад Амирхановлул кIицI лавгунни гьуртту хьусса коллективрттаву так ца «ГъазиГъумучи» ансамбльданул диркIшиву конкурсрал тIалавшиндарацIун даркьусса къавтIаву (миллатрал аьдат къавтIаврищал хIаласса). Барчаллагь увкунни школалул директор МахIаммад Хъунбу­ттаевлухь, методист Зарема Рашкъуевахь ва оьрчIащал зузи­сса цинявппагу пишакартурахь. Цалчинмур даражалул дипломращал ансамбльданун пишкаш дурунни дачIу.