[dropcap]В[/dropcap]ай гьантрай 95 шин там хъанай дур щалагу билаятрай ва дазул кьатIув машгьурсса Склифосовскийл цIанийсса Москавуллал анавар кумаграл азарханалул институтран.
Ва азарханалий хьхьичIунсса хIакинтуравух зий бур Читтурдал шяравасса ХIасанхIусайннул ва ДучIиннал шяравасса Уммусалиматлул душ Юсупова Индира.

Имара Саидова
ЧIивинияцIава хIакиннал пишалух эшкьи хьусса душнил, цила хиял бартлаган бувну, хIакьину вания хьуну бур лавайсса даражалул функционал диагностикалул хIакин. Цила пиша дакIнихтуну ххира­сса, зун гъира-шавкь дусса жагьилсса хIакин чIирисса чIумул мутталий, Дагъусттаннай ба­къассагу, машгьурну бур Аьрасатнавугу.

[dropcap]М[/dropcap]едициналул академия­лучIасса лицейгу марцIсса ххювардай къуртал бувну, Индира бувххун бур Дагъусттаннал Медициналул академиялувун, къуртал бувну бур хьхьичIунсса хIасиллай. 2015 шинал Склифосовскийл цIанийсса азарханалул кардиологиялул отделениялий ординатура къуртал бувну махъ дуллуну дур ванин хIакиннал сертификат. ХIарачат бусса, цила даву хъирив лавну дан кIулсса жагьилсса пишакарнай дакI даркьуну, неврологиялул отделениялул хъунаманал Индира тиккува зий бацIан бансса маслихIат ккавккун бур. Ванин цинма тIурча, Ватандалийн зана хьунсса пикри бивкIун бур. Гьай-гьай, бигьану бакъахьунссия жагьилсса душнин Аьрасатнал ца яла хьхьичIунмур азарханалий къашайшалтгу, хIакинталгу рязи банну зун.

Дагъусттаннаясса жагьил­сса хIакиннайн Аьрасатнавусса къашайшалтрал вихшала къадуллалисса кIанттурдугу хIисав шайхьунссар куну, цIувххукун, Индира тIий бур:
— Мукунсса иш уттинин цалвагу къавхьуссар. ХIатта, бусурман душ бусса кIул шайхту, хъиннува хIурмат буллан бикIай, — тIий.
Индира зузисса неврологиялул отделение бур инсульт хьу­сса, личIи-личIисса къюкIлил азарду дусса къашайшалтран анаварсса мутталий тIайласса диагнозру дишин аьркинсса. Шикку дирхьусса диагнозрайн бувну, гихунай къашайшала хъин уллай бур. Вайннахь да­къар бяйкьинсса ихтияр.

— Шикку хатIалий агьсса хIа­кин цаягу акъассар. Неврологиялул отделениялул хъунама хIакин Рамазанов ХIанипа цувагу уссар хьхьу-кьини дакъа къашайшалтрал ялув авцIуну. Укун кьянкьасса тIалавшиннарду ду­сса азарханалий хIакинтураясса жаваблувшиннардугу хъуни­сса дур», — тIий, буслай бур Индира.
Даву кIанийн дуртун дуллалисса жагьилсса хIакиннай дакI даркьуну, Индирайн вихшала дуллай бур ординатортал хIадур буллангу. Гьашину кIилчинсса шинни ванил ординатортуран къюкIлий УЗИ бан лахьхьин буллай.

— Къашайшалтрал оьрмурду ххассал баву мурадрай, институтраву бацIаву дакъа, дачин дурну дуссар цIушиннарду. Масалдаран, гьашину Аьрасатнаву цалчин Склифосовскийл цIанийсса институтраву робот­рал кумаграйну бунни нейрохирургиялул операция. ХIакиннал пиша куртIну лахьхьин ва даву канилух дуккан дан жагьилсса хIакинтуран шикку буниялагу хъуннасса практика хъанай дур, — тIий бур Индира.
ХIакинтурал тIайлану диагнозру дишаврийн хъар хъанай бур къашайшалтрал оьр­мурдугу. УЗИ-диагностикалул хIакин, цуксса ххуйну институт къуртал бувсса ухьурчангу, азарханалий зузисса даврил опыт бакъахьурчан, бюхъавай вайнначIан къабачай. Мяйжаннугу, цала даву ххуйну кIулсса хIакинтурал цIа ччяни кIул шай агьалинангу. Дагъусттанная ва Аьрасатнавасса цикссагу къашайшалт бур утти, Индира Юсуповал цIа дургьуну, Склифосовскийл цIанийсса институтравун букIлай. Цила даврин бишлашисса яла хъунмур кьиматнугу ванил ккалли буллай бур къашайшалтрал чулухасса барчаллагьру.