«Цинявппагу цачIуну – жува Аьрасатру»
Ноябрьданул 4-нний, Халкьуннал Цашиврул кьини, М. Горькийл цIанийсса Оьруснал театрданул хьхьичI «Цинявппагу цачIуну – жува Аьрасатру» тIисса цIанилу хьунни щаллагу республикалул байран.
Бадрижамал Аьлиева
Ва кьини кIюрххила шагьрулул дянивалу музыкалул, ххарисса чIурдал ларсун най дия. Зузи кьини дакъашиврух, чIаланну кьуртIуну нанисса ссутнил дякъих къабурувгун, кIюрххила чан-чанну тIий буклай, ахттайннин чIявусса инсантал бавтIуна байрандалийн.
[dropcap]В[/dropcap]а кьинисса байрандалул шадлугъирттавух гьуртту хьуна Жамаллул цIанийсса Художествалул училищалул, Экономикалул ва дизайнрал техникумрал студентътал, МахIачкъалаллал оьрчIал художествалул школалийн заназими.
Тинмай цалва гьунарду ккаккан буллай бия республикалул пагьламантал. Дагестанские Огни шагьрулийсса Республикалул циркрал искусствалул школалул ва эстетикалул тарбия дулаврил «Ссурулккуртта» тIисса цIанилусса центрданул (ш. МахIачкъала) чIава пагьламантурал гьунарданий ва сисаврий тамаша буван бавтIмигу чIявуя.
Ахттайнния тиннай дайдирхьуна ДР-лул Культуралул министерствалучIасса Республикалул Халкьуннал творчествалул къатлул сакин дурсса хъуннасса концерт. Муний гьуртту хьунни Лакрал райондалиясса «Вайлар» цIанилусса балай учаврил группа, ЦIуссалакрал райондалиясса «Эдельвейс» цIанилусса къавтIаврил группа.
Концертрал программа сакин хьуну дия личIи-личIисса бутIрая. Жагьилтуралмур бутIуву гьуртту хъанай бия республикалул личIи-личIисса вузирдал студентътал, миннавух бия гьунар бусса жагьилсса балайчи, КIундиннал шяравасса Маммаева Заринагу.
Гьарцагу гьурттучи лайкь хьунни ДР-лул Культуралул министерствалул чулухасса дипломран.
Цашиврувур билаятрал гуж бусса
Ноябрь зурул 4-нний Лакрал райондалул администрациялий хьунни Аьрасатнал халкьуннал Цашиврул кьини.
Зулайхат Тахакьаева
Муний гьуртту хьунни райондалул идарарттал каялувчитал ва зузалт, школарттал директортал, учительтал ва дуклаки оьрчIру. БавтIми барча буллай, райондалул бакIчи Юсуп МахIаммадовлул увкунни: «ЧIявусса миллатру ялапар хъанахъисса Аьрасатнал билаятран ва байрандалул агьамшиву хъуннассар. Ванил дур тарихийсса мяъна, Аьрасатнал паччахIлугъ, билаятрал гуж ва сий, инсантурал цашиву ва ватан ххирашиву цIакь шаврил цIаний халкь цачIун буллалисса. Аьрасатлувтурал хъунмур мурадну хьун аьркинссар ва цашиву никирая никирайн дуруччаву».
Ккурккуллал школалул директор Лилия Буттаевал бувсуна байрандалул тарихрая. Гъумучиял школалул дуклаки оьрчIал дурккуна миллатирттал цашиврун хас дурсса назмурду. Магьирлугърал къатлул зузалтрал увкуна Ватандалухасса, миллатирттал цашиврухасса ва дусшиврухасса балайрду.
Цашиврул кьини Ваччав
Ноябрь зурул 2-нний Ккуллал райондалул культуралул къатраву хьунни Аьрасатнал Халкьуннал Цашиврул кьинилун хас бувсса мажлис.
ХIажимурад ХIусайнов
Райондалул бакIчинал цIания ва цала чулуха байрандалийн бавтIми барча бувна райондалул администрациялул виваллил политикалул отделданул каялувчи Шамххал Хизриевлул:
— На дакIнихтуну барча дуллай ура Аьрасатнал Халкьуннал цашиврул кьини. Ва кьини хъанахъиссар Аьрасатнал тарихраву хьунабакьлай бивкIсса балардаву халкь ца хьуну буккан бювхъусса кьинирдавасса цану. Муданмагу мукун бивкIссар. 1612-ку шинал тархъан бувну бивкIссар Москав польшанал шляхтураща. Тархъан баврил биялагу цайнма лавсун бивкIссар Мининнул ва Пожарскийл. Мукунма, СССР-данул цинявппа халкь цIакьну цачIун хьуну, 1945-ку шинал ххит дурссар фашизм. 1999-ку шинал Дагъусттаннайн дуркIсса террористурал кьюкьригу халкьуннал цашиврийну ххит дурссар, — куна ванал.
БавтIми мукунма барча бувна райондалул Ветерантурал советрал председатель Аьбдул Загьидиевлул, Жагьилтурал центрданул директор МахIаммад ХIусмановлул ва цайминнал.
Муния махъ ккаккан дуруна культуралул зузалтрал концерт. Укуннасса тяхъашивуртту хьунни ноябрь зурул 4-нний райондалул циняв шяраваллавугу.
Цахьусса миллатру бух бан къашайссар
Щалагу билаятрай ноябрь зурул 4-нний кIицI лагайсса Аьрасатнал Халкьуннал цашиврул кьинилун хас дурсса мероприятиярду хьунни ЦIуминалийсса ЦIуссаккуллал 2-мур школалий.
Имара Саидова
Октябрь зурул 26-нний школалий пионервожатый МахIаммадова Саниятлул каялувшиннаралу дунни Халкьуннал цашиврул кьинилун хас дурсса шадлугърал линейка. Шикку гьуртту хьунни 7 – 11-ми классирттал дуклаки оьрчIру. 8-ми классирттал дуклаки оьрчIал балжину бувсунни байрандалул агьамшиврия.
ЦIуссаккуллал школалий дуллалисса цинярда мероприятиярдавух чялишсса гьурттушинна дайсса тарихрал дарсирдал учительтурал: Кусаева Аьйшатлул, Гъавзиева Сиясатлул, Рамазанова ПатIиматлул цала ихтилатирттаву гьарта-гьарзану бувсунни байранналул тарихрая ва му сакин шаврия. ЦIуссаккуллал 2-мур школалий аьдатравун даргьунни «Цахьусса миллатру бух бан къашайссар» тIисса девизралу гьарица шинал байранналун хасну дуллалисса ххаллилсса мероприятиярду.
КIицI лаганну, школалий нюжмардул мутталий най диркIшиву Халкьуннал цашиврун хас дурсса дарсру, классный часру.
Байранналун хасну, октябрь зурул 25-нний физкультуралул учитель Сулайманова Издаглул сакин дунни «Веселые старты» тIисса 3-4 классирттал оьрчIал дянивсса спортрал бяст-ччаллу.
