«Ччива цал ттигу хьунаакьин ттула нитти-буттащал»

Дянив Давдил ппу ХIусайн. 1985 ш.

ХIусайннул арс Увайсов Давди

Увну ур ноябрь зурул 17-нний 1948-ку шинал Ва­ччиял шяраву ХIусайннул ва Залиххал къушлий. Ваччав ва ЧIяв бувккуну бур дянивмур даражалул учкъула.

Армиялия зана хьуну мукьах къуртал бувну бур та чIумалсса Орджоникидзеллал Зунттал институт, язи бувгьуну бур инженер-электрикнал пиша. Зий ивкIун ур МахIачкъалаллал Керамзит заводрал хъунама энергетикну, яла – хъунама инженерну, 48 шинал мутталий. Махъсса шиннардий Давди бартдигьлай ур цаннияр ца хьхьичIунсса ва агьам­сса жяматийсса давурттугу. Ванал хIарачатрайну сакин дурну дур Гьарун Саэдовлул цIанийсса фонд – хъинну лябукку буну ва мюнпатну зузи­сса. Му бакъассагу, ванайн тапшур бувну бур шагьрурдайсса Ваччиял диаспоралул муданмасса къайгъурдугу.
Ваччиял жяматрал лайкьсса арснан вай гьантрай хъанай дур оьрмулул 70 шин. ДакIнийхтуну барча дуллайгу буру юбилей.


Давдил кулпат

1. Цукунсса хьуна оьрчI­ний вийнма яла гужсса асар биян бувсса зат, иш?
— ДакIний личIансса затру оьрчIний хъинну чIявусса шай. Цания ца личIи бан багьлай буния махъ, бусанна ца укунсса иширая. Му хьуна, ваца нара ттулла нину хъяврин дурсса кунмасса зат, дурнугу дакъанура. Му чIумал ттул дия мяйра шин. Хъунама уссищал архIал ца ттуккуй жу чартту ххилай бикIайссияв ялув-шяраву цIусса къатри дуллалисса кIанттайн. Ца кьини, аьвкъу-гъили хьуссияв, цивхьуссияв къакIула, ттул чурххай хъинну хIал чан хьуна. Ниттил на мува цIана тIайла увккунав шавайн. Ахттая махъ, нава кунмасса цаппара оьрчIру бувкIун, жува яхъанахъисса къатрал хьхьичIсса хIаятраву бялахълан бивкIуна. Ттунгу гъира бивзун, къашайшивугу хъамариртун, хIала ивзссияв гайннавух. Даврия зана хьуну нани­сса ниттил, аьлахълахъисса на ххал хьуну: «Ина, ттухьгу къашавай ура куну, аьлахълан лавгун ивкIун урахха», — куна. Ттул дакIнийн ми махъру хъинну бювххуна: ваца, ттуйва тахсиргу бакъанува, нава тахсирданухун агьну усса куна чIалай ияв.

2. Цими никирайн дияннинсса кIулли вин вила ппухълуннал нясав? Буси яла архманал цIа.
— КIулли арулла никирайн дияннинсса:
1.Мангъал МахIаммад (жул тухумрайнгу Мангъахъул учай­ссар). Мунал арсру – ХIажимуси, Шагьмилав.
2.Мангъал ХIажимуси. Мунал арсру – Аьли, МахIаммад, Давди.
3.Мангъал Давди. Мунал арс – ХIусайн.
4.ХIусайн. Мунал арс – Давди.
5.Давди. Мунал арсру – Увайс, ХIусайн, Шяпи.
6.Увайс. Мунал арсру – Давди, Давуд, ХIусайн, МахIаммад.
7.ХIусайн. Мунал арсру – Ярагъи, Шяпи, Давди, Мусттапа, Маммацца.

3. Инсаннал хасиятраву винна яла ккарккун къаччимур лишан?
— Ялунай ххуй инсангу хъанай, махъа маз буллан икIайсса тура.

4. Вила оьрмулуву яла алши бакъамур шин?
— 1991-кусса шин. Му шинал, ттучIана кумагран дачалийн нанисса ххуллий, 14 шинавусса ттул арс машиналул кку­ччу увссар.

5. Яла алши бумур шин?
-2018-кусса шин. Ва шинал ттул чIана-чIавама арснан хъатIи бувссар. Буруккин бувкссар.

6. ВичIара циксса арцу хьувкун дигьаларгун дикIанссия вил дакI?
-Арцул, хъуслил тачIаврагу дакI паракьат къадайссар. Ми чIяруссаксса дакIгу хъиннура гьалак дирчуну дикIайхьунссар. НахIуну шанангума къашайсса ххай ура миннул заллухъруннаща. Бургира хIакьину лагма хъанахъимунихгу.

7. Инсаннал тахсирдавасса цумур тахсир хьунссия ви­ща бигьану багъишла битан?
-ХатIалийсса тахсир.

8. Бувагу къабитан?
-Ттула тухум, гъанчу, дустал оькки-ккаккул буллалаву, ба­къурду бишаву.

9. Ссан диял къашай вил чIун?
-Зий аьдат хьусса инсаннан тачIаврагу диял къашай­ссар чIун.

10. Бартлавгун ччисса вила шанма мурад?
-Ттуща хьунссар ттула дакI­нийсса сайки циняв мурадру щаллу хьунни учингу. Амма ттула вания тинмаймур оьрмулул мураднугу ккалли буллай ура ттулациринналгу, жяматралгу, лакралгу дянив ттулла цIагу, хIурматгу ябаву, буруччаву.

11.Вила оьрмулуву хъинну ххирасса кIантту бувгьусса шама инсаннал цIа?
-Бутта, бава, ХIусайнхъал МахIаммад-Шарип.

12. Винма ххуй бизай­сса хъамитайпалул сурат?
-Ттула щарссанилгу, ттулва душнилгу сурат.

13. Вина кьамулсса чув адаминал сурат?
-Ттула буттал сурат.

14.Агарда бюхъайсса бивкI­ссания, инава ци кIанттай, ци чIумал увну ва ци билаятрай яхъанай ччива вин?
-Нава увсса ттула буттал шяраву, Лакку билаятрай.

15. Ссаяту бикIай вил яла хъунмур пахру?
Пахру къакIулли, амма на рязину икIара ттула оьрчIру тIайласса ххуллийх най бушиврия.

16. Цукунсса дур вил виятурасса къарязишиву?
-Ци-дунугу агьамсса зат дуванна тIий унува, къадурнурагу личIай . Духьунссар цаймигу диялдакъашивуртту, амма ми да­ххана дуллан утти чIалгу хьуну ухьунссара.

17. Яла къаххирамур дукра?
-Ккашигу, мякьгу ккавксса, кIулсса инсаннан къаххира­сса дукра къадикIайссар. Щар­ссанил цIувххукун, ци дуканна куну, ина дуллумур дуканна учара.

18. Яла ххирамур дук­ра?
-ХхункI, лакку гьавккури.

19. Ссаятусса бикIай яла хъунмамур хIучI?
-Къахьуннав аьрщи сукку, къабаяннав дяъвилул чIу.

20. Хьуссарив вил оьр­мулуву винна инара ттинин ба­гъишла ритан къахъанахъи­сса къел?
-Багъишла ритан къахьун­сса къел ттула оьрмулуву хьусса ххай акъара.

21. Лавгсса заманардавасса цIанихсса инсантурава­сса цуманащал хьунаакьин ччива вин?
-Ччива ттива-тти хьунаакьин, аьпа баннав цал, ттула нитти-буттащал, миннахь ттула дакIгу дарчIуну, ттула багьу-бизулуятугу бувсун, яла миннах вичIи дишин, щаллу хьуну бурив цала дакIний бивкIсса мурад ххал бан.

22. Цукунсса бур, вил пикрилий, лакрал миллатрал яла хъунмур буруккин, цукунсса бур мунил ялун бучIантIимур?
-Зунттавусса жула лакрал кIирагу райондалул жяматир­ттал дакъар хIакьинусса заманалуха лархьхьуну дикIан аьркинсса шартIру, чIярусса дур захIматшивуртту. МуницIунма бавхIуну, ххялтIа буклай бур Лакку кIанттайсса жямат, эяллай дацIлай дур шяраваллурду. Шагьрурдайгу ялу-ялун чан хъанай бур ниттил мазрай гъалгъа тIун, ккалан шайсса лак.

23. Ци дахчилай дур хIакьину Дагъусттаннахун, цил аьнтIикIасса кIанттун ва надирсса миллатирттан лавхьхьуну, ххуйнугу, ххаллилнугу ялапар хъананшиврул?
-ХьхьичIра-хьхьичI, бакIрая ччаннайн дияннинсса коррупция, хъуни-хъунисса къуллугъру арцух машан ласласаву ва хъиривва яла хъямалашингу дуллалаву. ХIатта жула оьрму ххуй бансса законну кьамул дуллан бувчIайсса депутатътуралгума цалла мандатру машан ласласисса тагьар дия ттинин Дагъус­ттаннай. Миннуяр хъунисса дайшишру яла ци дикIайссар.

Хьунхьуви, жура хьурдай тIисса, хъин чулийннайсса да­хханашивурттугу, гьаз хьунхьуви простойсса инсантурал оьрмулул даражагу. Иншааллагь!