Ноябрь зурул 8-нний Щалагу жула билаятрай дакIнийн бичайссар къуллугърал бурж биттур буллай жанну дуллусса виваллил иширттал органнал зузалт.

[dropcap]Н[/dropcap]оябрьданул 8-нний Да­гъусттаннайгу дакIнийн бивчунни къучагъшиврий жанну дуллусса цала вирттал. Ми­ннал аьпа абад бан министерствалул къатрал хьхьичI дацIан дурсса гьайкалданучIа тIутIив дирхьунни Дагъусттаннал БакI­чи Владимир Васильевлул, Дагъусттаннал виваллил иширттал министр, полициялул генерал-лейтенант Аьвдурашид МахIаммадовлул, Дагъусттаннал ХIукуматрал вакилтурал ва гужирдал структурардал каялувчитурал.
Аьпалул мажлисрай мукунма гьуртту хьунни зузалтрал щахъами, оьрчIру, гъан-маччами.

Цала аьрали дустал абадлий дакIний бикIантIишиву ккаккан буллай, МВД-лул ва Росгвардиялул хIаписартал лавсун най бия тIутIив ва лавхъсса майлул чирахъру.
Яла асар хьунмур, бюхханмур лахIза бия ттуршвахъул лавхъсса чирахъирттай «Помним» тIисса хIарпру дишаву.
МВД-лул къатрал лажин-чIирай дацIан дурсса хъунна­сса мониторданий ккаккан дуллай бия милицанал тарихрая бусласисса, мукунна къуллугърал бурж биттур буллай жанну дуллусса Дагъусттаннал ОВД-лул зузалтрал сияхI аьч дуллалисса видеоролик. Лехлай бия хIаписартурал къучагъшивриясса балайрду. СияхIрай дур 1154 цIа.
Вайннал аьпалун минутI­райсса пахъ багьавугу дурну, гьаваллавун итабавкьунни кIяласса шарду.