[dropcap]Г[/dropcap]ьашину ХVI-чин жулла республикалий хьунни визуал творчествалул ТIиртIусса Региондалул «Радуга» цIанилусса конкурс, цилгу машгьур дуллалисса халкьуннал творчествалиясса,

фольклорданул ирсираясса, этнографиялиясса фильмру. Мукунна хьунни информациялул даврил Республикалул конкурс «Культура-Онлайн».

---

Бадрижамал Аьлиева
«Радуга» конкурс даврицIун кабакьу буллалиссар Аьрасатнал Федерациялул Культуралул министерствалул, В. Поленовлул цIанийсса Аьрасатнал Халкьуннал творчествалул къатлул, «Дагъусттан» ГТРК-лул, «Да­гъусттан» РГВК-лул.
Вай конкурсирттай ххув хьуми барча буллалисса батIа­ву хьунни Р. ХIамзатовлул цIа­нийсса Национал библиотекалий. Му тIиртIунни ДР-лул культуралул министрнал хъиривчу, Республикалул Халкьуннал творчествалул къатлул директор Марита МухIадовал.

Конкурсрал жюри сакин хьуну бия республикалий ва мунил кьатIув цIарду кIулсса искусствалул минахуртурая, кинорал ва телевидениялул аралувусса усттартурая: Ссалам Хавчаев, Мисрихан Маммаев, Гулера Камилова, Саида Оьмарова, Аьбдулла Бечедов, Юрий Ханжов, Татьяна Петенина, Светлана Кривоносова. Вайннал ххал дурссар 40-нния лирчусса видеофильмру, паччахIлугърал, муниципалитетирттал студияр­ттал ва видео ххираминнал ларсъсса. Ми давуртту ххал диргьу­ссар «пишакарсса студияртту» ва «муниципал, цивппа заллу­сса студияртту ва видеолюбительтал» тIисса категориярттай.

Гьашинумур конкурсрайн гьан дурну дия 40-нния лирчу­сса видеофильмру: Башкортос­ттаннаясса, Комилиясса, Ханты-Мансийскаллал автоном округраясса, Приморскаллал крайраясса, Нижегородуллал, Иркутскаллал, Самараллал, Новосибирскаллал, Липецкаллал, Ленинградуллал, Орловуллал областирттаясса ва мукунна Аьрасатнал цаймигу регионнаясса. Дагъусттаннал чулуха конкурсравух гьуртту хьуна «Дагъусттан» ГТРК ва РГВК, Къарабудагъккантуллал, Гумбетуллал, Къайтагъуллал, Буйнакскаллал, Ахттиял районнаясса ва МахIачкъала, Къизлар, Избербаш, Дагестанские Огни шагьрурдаясса муниципал студияртту.

Конкурсрал лагрулий ва шинал дянив хьуссар видеостудиярттал зузалтрансса 4 семинар, миннувух гьуртту хьу­ссар респуб­ликалул шагьрурдая­сса ва районнаясса пишакартал. Конкурсрай ххув хьуминнан наградар­тту дулаву дакъассагу, кIай семинардавух хьхьичIунну гьур­тту хъанай бивкIминнан ва кьини буллунни «Использование современных средств и приемов визуализации в работе над творческими проектами» тIисса цIанилусса удостоверенияр­ттугу.