Дагъусттаннал Росгвардиялул управленилий хьунни «Знаменосец. Война и мир генерала Романова» луттирал презентация.
Лу итабавкьуну бур Аьрасатнал Виричу, генерал-полковник Анатолий Романовлун 70 шин шаврицIун бавхIуну.
Луттирал презентация дунни Дагъусттаннал Росгвардиялул управлениялул хъунаманал хъиривчу, полковник Натик Балабековлул ва пресс-службалул хъунама, полковник Константин Шияннул.
Натик Балабековлул бувсунни луттирая, автортурая ва редактортурая, виваллил аьралуннал къуллугърай хъунмасса захIмат бивхьусса генерал-полковник Анатолий Романовлуя, ванал къучагъшиврия. Бувсунни цанма бахтти хьушиву бусалдаравун агьсса аьралуннал хъунаманащал хьунаакьин.
— Анатолий Романов гьарицагу росгвардеецнан къучагъшиврул, пишакаршиврул ва Ватан ххирашиврул эбратну хъанахъиссар, — увкунни ванал.
Цала ихтилатраву Константин Шияннул кIицI лавгунни укунсса вирттаврая эбрат ласлай тарбия дуллан аьркиншиву ялун нанисса ник.
Буккин ччинаща лу ласун бюхъантIиссар МахIачкъалаллал ОМОН-лул библиотекалува ягу Росгвардиялул управлениялий.
