ЦIанасса, шяраваллил хозяйстволул ишру захIматшиврухун багьсса заманнай, агьалинал чIярусса хъу-лухччив кьариртсса чIумал, ва аралуву вай масъаларттаха зузисса аьлимтал ляличIинува бусравну ва сийлий бур.

Андриана Аьбдуллаева
Ттун бусан ччива, шяраваллил хозяйствалуцIун дархIусса элмулул ххуллий зий, чIярусса мюнпатсса ахттаршиннарду дурсса НикIул арс ХIасанов ХIасаннуя. Ванал цIагу чIяву­ссаннан бав­ссар, кIулссар. ХIа­сан ур Куцрал шяравасса. Къуртал бувну бур Гъумучиял дянивмур даражалул школа. Школалий дук­лакисса шиннардийва бивкIун бур ХIасаннул шяраваллил давурттахсса гъира. Ва танийва агроном хьунсса пикрилий ивкIун ур.

Школа къуртал байхту ув­ххун ур Дагъусттаннал шяраваллил хозяйствалул институтрал агрономтал шайсса факультетрайн. Дуклай унува, цала пишалуцIун дархIусса элму ахттар дуллансса пикри хьуну, 1962 шинал увххун ур аспирантуралувун. 1967 шинал дурурччуну дур шяраваллил хозяйствалул элмурдал кандидатнал диссертация. 1986 шинал К.А. Тимирязевлул цIанийсса Москавуллал шяраваллил хозяйствалул академиялуву дурурччуну дур элмурдал докторналмур диссертациягу.

РяхцIалла шин шавай дур ХIасаннул шяраваллил хозяйст­волуцIун бавхIусса элмулул ва кIулшивуртту дулаврил хху­ллий личIи-личIисса жаваблув­сса къуллугъирттай зий: шяраваллил хозяйстволул НИИ-лул (научно-исследовательский институт) отделданул хъунаману, Дагъусттаннал элмийсса центрданул директорну, Шяраваллил хозяйствалул министерстволул элмулул ва техникалул хьхьичIуннайшиврул управлениялул директорну, биогеохимиялул лабораториялул хъунаману.
ЦIанасса чIумал ХIасан каялувшиву дуллай ур Дагъус­ттаннал элмийсса центрданул биологиялул луртаннал Прикаспийский институтрал лабораториялий. Шяраваллил хозяйствалун хъунмасса мюнпат бу­сса чIярусса ахттаршиннарду дурну дур ХIасаннул. Ва ур ссу­ттил лачIа ва люцерна дучIан даврил лябуккусса технологиярттал автор. Аьмну ванал кIунттила дурккун дур 450-нния лирчусса элмийсса давуртту, 8 монография, лавсун бур 10 патент.

Дагъусттаннал аграр уни­верситетрачIа ХIасаннул тIив­тIуну бур республикалий ва кьатIув ккаллисса хъу-лухччинул масъаларттацIун бавхIусса элмийсса школа. Уттинин ва школалул ларсун дур Аьрасатнал Шяраваллил хозяйствалул министерствалул кIира грант, хIадур дурну дур ряхра инновациялул проект, хьуну бур «Архимед» «Машук» (кIийла), «Зворыкиннал проект» конкурсирттал лауреат.
2004 шинал ХIасаннул ларсун дур «Шинал аьлимчу» тIисса бусравсса цIа, лайкь дурну дур Щалагу Аьрасатнал Выставкарттал центрданул мусил медаль. Цува зузисса шиннардий ванал хIадур бувну бур 8 элмулул доктор ва 18 кандидат.

Ва ур АьФ-лул шяраваллил хозяйствалул лайкь хьу­сса зузала, ДР-лул лайкь хьу­сса элмийсса ишккакку, ДР-лул лайкь хьусса агроном. Ванан дуллуну дур В.И. Вернадскийл цIанийсса экологиялул фондрал медаль ва Аьрасатнал экологиялул академиялул академикнал цIа. ХIасан хъанай ур Дагъусттаннал БакIчиначIасса агропромышленнострал комплекс хьхьичIунмай баврил Советрал член.

ХIасаннул хъуннасса ххаришиву дур, элмийсса ххуллу язи бувгьуну, цала шаттирайх нанисса душнил оьрчIая. СалихI ва Камилгу шяраваллил хозяйствалул элмурдал кандидатътал бур. Арснал оьрчI НикIу дуклай ур Бауманнул цIанийсса Москавуллал паччахIлугърал технический университетраву.
Вай гьантрай НикIул арс ХIасан ХIасановлун оьр­мулул 80 шин бартлаглай дур. Цинявппагу ва ххираминнал, ванал хIурмат буминнал цIанияту барчагу уллай, чIа тIий буру цIуллу-цIакьшиву, гьарца дуллалимуниву тIайлабацIу.
Вил захIмат хайрданийн бувккун, дюхъаннав жула хъу-лухччи, аргъ дизаннав аьрщарал.