Гьарца чIиви-хъунсса шагьрулул бикIай ца цинналусса лишандалун ккаллийсса ва циняв цачIун батIайсса дямайдан.
Оьрмулул хъуниминнан МахIачкъалаллал майдан дакIний бухьунссар хъунисса шадлугъирттан хасну дувайсса диркIсса яргсса парадирттал кIанттуну.
З. АьбдурахIманова
Ттун кIулну, 2000-ку шиннардил дайдихьулий хъуншагьрулул майданнивсса асфальтрал къат ххартI дурну, личIи-личIисса рангирдал чартту бавкьуна. Гайгу цIана ссувссуну, кIантту-кIанттурдай ххиттуйн буклай бур. Гания мукьах гикку цичIав хъуннасса даву дурну дакIний бакъар.
Гьашину гъинттул Республикалул БакIчи В.Васильевлул «майдан бакьин бансса ният дуссар» куния шинмай хасъсса пишакартал зий бур му проектраха. Шиккува кIицI лаган, проект цурдагу ларсун дур «Формирование комфортной городской среды» тIисса федерал программалийн.
Проектраха зузиминнал мурадгу бур МахIачкъалаллал майданнив жула миллатирттал культурардал, тарихрал лишанну ишла дурсса дизайнрайн чул бивщуну зунсса. Майданнив бикIантIиссар хIасул бувну щюллишиву гьарзасса ва халкь бигьалаган-щябикIансса кIану, мукунма дагъусттаннал касмурдал лишанну, накьичру ишла дурну бувсса мурцIурду ва цаймигу давуртту.
Дакьин дурну, цIу дантIиссар В. Лениннул гьайкалгу.
Проектрал автортал мукунма пикрилий бур чIявусса халкь батIайсса, ЦIусса шинал елкалул, Ххувшаврин хас дурсса парадрал ва цаймигу шадлугъру дувайсса, арт-объектру дирхьусса кIанттурду уттизаманнул технологияртту ишла дурну буван.
Цаппара нюжмардал хьхьичI ДГТУ-лул студентътуращал хьусса хьунабакьаврийгу республикалул бакIчинал тикрал бувунни МахIачкъалаллал майдан бакьин бансса 350 миллион арцул Москавуллал мэриялул бахшишран итабавкьушиву ва шагьрулул жагьилмур никирахь, хаснува ва вузрал архитектуралул ва строительствалул факультетрай дуклакиминнахь, тавакъю бувна му агьамсса проектравух цалами идеярттащалгу гьуртту хьун.
Проектраха зузиминнал шагьрулул халкьуннан гикку дурну ччимургу хIисавравун ларсун дур.
