Вай гьантрай Аьрасатнал МВД-лул полициялул участковыйтурал къуллугъ сакин хьуну 95 шин бартларгунни.
Ва кьини шадлугърал мажлисрай гьуртту хьунни ДР-лул Виваллил иширттал министрнал хъиривчу, полициялул хъунама, полковник Дмитрий Гутыря, МВД-лул зузалтращалсса даврил управлениялул хъунама, виваллил къуллугърал полковник Сахават Сахаватов, Жяматийсса низам дуруччаврил управлениялул хъунама, полициялул полковник Микаил Маккашарипов, участковыйтурал даврил отделданул ва балугъравун къабивминнал иширтталсса байсса подразделениярттал хъунаманал кIанайсса полициялул подполковник Сапиюлла Салатгареев.
— Ва службалий цаппара дахханашивуртту хьунни, амма, хьхьичIрасса шиннардий кунна, хIакьинусса кьинигу вайннал хъуннасса хъар лархъун буссар. Участковыйтурал чулухуннайсса аьй-бювкьурду чIярусса дунугу, республикалул МВД-лул каялувчитурачIа ва къуллугъ мудангу кьадру-кьиматрай буссар агьалиначIан ца яла гъанмур даву хIисаврай. Цаппара центрдая архсса шяраваллаву, цания ца подразделениялул пишакар бюхъайссар къалякъин, амма участковый мудан лякъинтIиссар, жяматрангу кIулссар, иш багьни, гьансса, оьвчинсса, кумаг бансса инсан шяраву ушиву, — увкунни цала ихтилатраву Дмитрий Гутырял.
Ва кьини давриву ххуйсса ккаккияртту чIалачIи дурсса участковыйтуран дуллунни хIурматрал грамотартту, баян бунни барчаллагьру.
