Уттигъанну «Планета» тIисса лагерьданий бигьалаглагисса Каспийскаллал оьрчIал къатлул оьрчIачIан бувкIунни 20 инсанная сакин хьусса делегация.
Гьарца шинах дувайсса му ихIсандалул акциялул сакиншинначину дур «Аьрасатнал ниттихъул» тIисса суккушинна, мунил чIарав бацIаву дуллай ур Каспийскаллал шагьрулул бакIчи М. Аьбдуллаев, мукунма «Восток» цIанилусса машлул къатта, «Дакьаврил Дагъусттаннал фонд», «Классный» ттучан, Каспийскаллал Ф. Аьлиевал цIанийсса ЦБС ва ишбажаранчитал – М. МахIаммадов ва Ш. Аьбдулхаликьов.
ОьрчIал хьхьичI махъ лавхъунни «Аьрасатнал ниттихъул» суккушиндарал председатель Таиса МахIаммадовал. Му суккушиндарал чулуха лагерьданул директор М. Кьасумовлун буллунни Барчаллагьрал чагъар.
БавтIминнал хьхьичI мукунма махъру лавхъунни «Дакьаврил Дагъусттаннал фондрал» председатель М. Даудовлул, Ф. Аьлиевал цIанийсса ЦБС-лул директор М. Темировал, ЦБС-рал хъунмур библиограф З. Аьбдуллаевал.
ОьрчIал дурккунни назмурду.
Ахирданий Каспийскаллал оьрчIал къатлувасса гьарцагу оьрчIан дуллунни нацIу бахшишру ва школалий аьркин дувансса кьай-кьуй. «Планета» лагерьданул цинявппагу оьрчIан тIурча, дуллунни морожнирду.
Бадрижамал Аьлиева
