[dropcap]М[/dropcap]ахIачкъалаллал кучардал 86 км ва шагьрулийн буххай ххуллурдал 40 км. манзиллайсса ххуллурду лайкьсса даражалийн буцлай сукку хьуну бур гьашину шагьрулул къуллугъру.

З.АьбдурахIманова
«Мюхчансса ва къулай­сса ххуллурду» тIисса федерал проект жула хъуншагьрулийгу щуруй дуссар 2017 шиная шиннай. Ми давуртту бартдигьлай , зий бур бригадартту МахIачкъалаллал 99 кучалий.

Хъуншагьрулул бакIчинал хъиривчу Мурад Аьлиевлул бусаврийну, хIакьинусса кьини 66 кучалий най дусса дур щириркIусса давуртту, миннува 6 бакьингу бувну, шагьрулул каялувшиндарайн тапшур бувну бур ва 9 бакьин бувну, хIадур бавай бусса бур.

ЦIана, мисалдран, байбивхьуну бур М.Горькийл цIанийсса кIичIира бакьин буллай, мукунма А.Богатыревлул цIанийсса кучалия ХI.Рустамовлул цIанийсса кучалучIан бияннингу давур­тту щуруй дур. Шикку 1,18 км. ххуллул манзилданийх асфальт бакьинтIий бур. Вай кучардай ялапар хъанахъисса халкьуннал бусаврийну, вайннан дакIний бакъар махъва-махъ укун кучарду бакьин буллай сукку хьу­сса иш.

Ми давуртту бакIрайн ларсун дур «Абук» ООО-лул. Вайннал зузалтрал 5 бригада зий бур М.Горькийл, ХI.ТIалхIатлул, Гь.Кьурбановлул, Леваневскийл ва Салаватовлул цIанийсса кучардай 10 спецтехникагу ишла дуллай. Хъирив ца яла чIярусса давуртту дусса Некрасовлул, Солдатскийл цIанийсса ва цаймигу кучардаха зунтIий бу­сса бур.