[dropcap]О[/dropcap]ьрчIру буруччаврил кьини ххаллилсса байран дунни цала аякьалийн лавсъсса оьрчIан ЦIуссалакрал райондалулКЦСОН-далул(Комплексный центр социального обслуживания населения).

[dropcap]О[/dropcap]ьрчIал байрандалий гьурттушинна дан бувкIун бия Центрданул хъунмур Малика Жамхатова, Новостройрайсса полициялул отделданул хъунама Арсен МахIаммадов, гьарица шинах ва байран дан кабакьу бай­сса «Рамос» ттучандалул вакилтал, райондалул Культуралул управлениялул зузалт. Мукуна цала хIадур бувсса дуклаки оьрчIащал увкIун ия хореограф Руслан МахIаммадов. Байрандалул мажлис бачин бувну бия Аделина Давлетмирзаева ва Аьйшат МахIаммадова.

[dropcap]Н[/dropcap]овостройрай зий дуссар ва Центрданул кIира отделение: ахIвал-хIал кIюласса, цIуллу-сагъшиврул ссуссукьушиву ду­сса оьрчIру бусса кулпатру кьамул байсса ва шиккун бучIан къашайминнаха аякьа дан шаппа-шаппай лагайсса. Дяхттасса отделениялул аякьалийн лавсун ур 400 инсан, миннава – 100 оьр­мулул хъунисса инсантал ва 300 оьрчI. Шаппа-шаппай лавгун, аякьа дуллалиссагу бур 200-нния ливчусса инсантал. Буниялагу, хъуннасса чирилул даву дуллалисса идара бур ва.
Гьашинусса байран тIайла дарцIунни мубараксса зума дугьаврил зуруйн. Ва кьини оьрчIру ххари бувсса, бялахъан бувсса Центрданул зузалтрангу, байран дан кумаг бувсса спонсортурангу кIилийнусса чири хьухьунссар.

ДарчIунни оьрчIайх цикссагу игрушккартту ва нацIу-кьацIурду. Байран укун лавайсса даражалий кIицI лаганшиврул, спонсорталгу лявкъуну, цила зузалтгу щирикIин бувну, хъунма­сса захIмат бишай гьарица шинах Центрданул хъунаманал хъиривчу Аьбидат Аьбдуллаевал. Байран наниссаксса хIаллайгу, оьрчIащал цуппагу хIала був­ххун, къавтIий, балай тIий, мажлис тяхъа буккан бай.
Мажлис къуртал хьуну махъ Центрданул зузалт бахшишир­ттащал лавгунни шиккун бучIан къашайсса оьрчIачIан шаппа-шаппайн биян.

Андриана Аьбдуллаева,
Имара Саидова