[dropcap]А[/dropcap]ллагьу Тааьланал дуниял мукьра задрай дацIан дурну дуссар тIар: аьлимтурал элмулий, хъуниминнал аьдлулий, мискинтурал дуаьлий, аваданминнал цадакьалий.
[dropcap]А[/dropcap]ллагьналгу инсантал дунияллий ца куццуй ляхъан къабувкун: кув дуну, кув дакъа, кув мискинну, кув ттуршаману, мискиннан цадакьа баву дунияллул ттарцIну хъанахъиссар. Мукун бухьувкун, инсаннал цала чурххая, кулпатрая ххи шайсса зат духьурча, му цадакьалун дулаву суннатссар.
Цадакьалун дулунмур дакъахьурча, чIа тIинахь ххуйсса жуав данссар – мугу цадакьари; канийну, мазрайну хъинбала баву — мугу цадакьари; элмулия цанма кIулмур бусаву – цадакьари; лажин тIайлану ургаву – цадакьари; ххуллийн тIайла ацIан аву – цадакьари; ххуллияту чару-зад гьаз баву – цадакьари; хъинбалдарал ххуллий лавсъсса ша – цадакьари; хъу дугьаву – цадакьари; мурхь бугьаву – цадакьари; халкьуннал дянив маслихIат баву – цадакьари; гьарца хъинбала – цадакьари. ХIасил, цадакьа бан ччай, дулунмур дакъаманал муъминтураха ххуйсса дуаь данссар.
Цадакьалун дулун яла ххирамургу щинни. Мякьсса инсаннан щин дулавунияр хъинсса цадакьа цамур бакъассар. Щин дакъасса кIанай мякьманан ца ххув щинал буллуманан ивкIусса инсан уттава увссаксса чири буссар.
Хъирив ххирамур – дукралийн бичайсса цIур. ЦIу цадакьалун булурча, ми цIу бивчуну дурцири дукра цадакьалун дуллуссаксса чири буссар. Мукунма дукра шахьан цIу дула тIий увкIсса инсаннан цIу дулурча, му цIарай шархьцири дукра цадакьалун дуллуссаксса чири буссар. Хъирив цадакьалун дулун хъинмур – дукия, лаххия. ДакI дияйсса чIиримур дуллуну хъинссар, дулун къаччай дунура дуллусса хъуннамурнияр.
Цадакьа бан яла чири хъунмамур чIунгу: нюжмар хьхьу, нюжмар кьини, Рамазан барз, бусурманнал байраннал кьинирду, зул-хIижжа зурул ацIвагу гьантта, миннул хъиривсса шанмагу гьантта, мухIаррам барз, хаснува Аьшурдул кьини, мавлудрал гьантри, баргъ-барз бувгьукун, гъарал кьаркьукун, хIаж байни, ссапарданий уккайни, ца даву дайдишайни, цIуцIавуртту диллан диркIукун, ца бунагьравун агьувкун, мукунма цайми-цайми иширттавугу, та барчагу, баву хъинссар. Бан-хьун тIий кьабитаву къахъинссар. Дунияллий сагъну уна бавугу хъинссар, ивкIукун, вихлува цаманал бувмурнияр.
«НасихIатуль аьвам» («ГьунчIукьатIан»)
тIисса луттирая
