[dropcap]В[/dropcap]ай гьантрай МВД-лул управлениялул объектру дуруччайсса полкрал (комендант полк) зузалтрал шадлугърал даражалий кIицI дунни пишалул байран.Гьашину ва къуллугъ сакин хьуну 16 шин хъанай дур.

 

2002-ку шинал, республикалийсса тагьар ччанарккусса, террористурал группарду чялиш бувксса чIумал, Дагъус­ттаннал МВД-лул каялувчитурал хIукму хьуну бур 2-мур ППС-рал полк сакин бан. 2013 шинал муния бувссар МВД-лул управлениялул объектру дуруччай­сса полк.

Шадлугърал мажлисрай их­тилат буллай, Аьвдурашид МахIаммадовлул кIицI лавгунни комендант полк ца яла бюхъу-каши думур полк бушиву МВД-лул ва чIа увкунни уттиния тихунмайгу полкрал зузалтрал цала къуллугърал бурж лавайсса даражалий бартбигьаву, цала биялдарайсса кIанттурдай дакьаву ва паракьатшиву дуруччаву.

— Дунияллийсса тагьар да­ххана дан хъунмасса бияла бу­ссар зу кунмасса, къуллугърал буржру дакI марцIну бартбигьлагьисса, жаваблувсса, дакьаврил ва низамрал къаралданий бавцIусса, агьалинал мюхчаншиву дуручлачисса полициялул зузалтрахь. Мури полициялул къуллугърал мурадгу. Комендант полкрал бигьа бакъа­сса ххуллу бивтссар. ЗахIматсса шартIирдай зий, полкрал зузалт­рал ккаккан бувссар цала пишакаршиврул даража, къуллугърал бурж бартбигьлай, ккаккан дур­ссар цала къучагъшиву, — увкунни министрнал. — ХIайп, тахсиркартурайн, террористурайн данди бацIаву полкрал зузалтран ххирану дарцIунни. Къуллугърал бурж биттур буллай жанну дуллунни 27 зузалал.

ХIакьину комендант полк ккаллину бур ца яла хъунмамур ва гьарца аьркиншин дузалмур бутIун. Полкрал зузалт хIакьинусса кьинигу мюхчан­шиврул хьхьичI ххуттай бавцIуну бур.
Барча бавуртту къуртал хьу­ну махъ Аьвдурашид Ма­хIаммадовлул бахшишру дунни давриву хьхьичIунсса зузалт­ран.

ДР-лул МВД-лул
пресс-служба
ХIадур бувссар
А. Аьбдуллаевал