[dropcap]М[/dropcap]ирза МахIанмадов, Бадави Рамазанов, МахIаммад-Загьид Аминов – вай дакIниймур, мазраймур, аькьлулул кьукьлакьимур биялну бусаннин къаливчIсса шаэрталли.
[dropcap]Б[/dropcap]ургъил чаннайну мюрш гъаравух бивтсса яргсса, цанна-цаннасса рангру цачIун хьуну, ссурулккуртта хьусса кунмасса жула шаэртурал ххуттавасса цану чIалан икIайва ХIасан КIуруховгу. Му хъунмасса пагьмулул заллу ия. Шаэршиву мунал касму дакъаяча – мунавусса хъунмасса гьунар бия. ЧIавану унува, мунал гьунарданун кьимат бишлай, Республикалул Лениннул комсомолданул премия дуллуссия, «Очищение огнем» тIисса назмурдал жужрахлу. Муния махъгу сий дусса назмурдал жужру итабавкьуссия лакку ва оьрус мазурдий. Назмурдаву гьанумур кIану бугьлай бия жула оьрмулия, пашманну личIлачIисса жула минардая, буттал улклуя чивчуминнул.
«Ххурххулул зуманив» тIисса назму ккалаккийни, цукуннив дакI аьсив хъанай дур, оьрмулуву хъанахъисса ишру исватну хьхьичI бацIлай бур.
Кьакьлай най бур
Лаккуй оьрмулул мархри,
Сагъсса чIу-чIитI бакъар
бакIай ва кьаннай.
Так муъминтал кунма,
мурхьру бур архний
Ахттайн чаклий
бацIан цачIунмай хъанай.
Жула мюрщи щархъаву бакъарив мюрщулт чан хъанай, миннащал чIу-чIитIгу бухлаглай. БачIва личIлай бур оьрчIру дарсирдайн буххайсса классругу. ДакI къума хъанай ливчIун ур шаэр «Бяхълай бур улча» тIисса назмулувугу:
Гьарай, вил пашманшиву,
Кьянатсса Буттал аьрщий,
Цумур ххуллул дуланттух
Бяйкьуривав вил арши?»
[dropcap]Л[/dropcap]аккуя халкь бивзун нанаву шаэрнан мукссава захIматсса затну чIалай бурхха, хIатта тIабиаьтравусса ххяххиярттугума дирзун дачин хьуну чIалай дур:
Ццацгу бур ххяллуя
ХхуллучIан бучIлай,
Лак кунма, Лаккуя
Лихъан ччай бурвав?»
[dropcap]Ш[/dropcap]аэрнал творчествалун хас дурсса чичрурду чансса къархьунни. Хьунссар уттигу цимирагу.
Цибанссар, дурцунни ца ттигу чугурданул ца яла зяй бумур синттул ххал. Цуксса хIайпнугу, лавгунни жула дянива ххаллилсса шаэр. Ччай бия ванан ва дунияллий, цукунсса цув духьурчагу, уттигу оьрму бутлан, цала дакIниймур шеърирдайхчIин чIявучихь буслан:
Валлагьий, щил ци тIийнугу,
Цира-ци къювурдал
дакI цIарцIлайнугу,
БучIир ва дунияллий
оьрму бутлан…
Вана ккуру ларгунни, жущала шаэр КIураххъал ХIасан акъа, щаллусса шин. Амма ванал лакрал литературалуву кьадиртсса чичрурду шеъриятрал якьутруну личIантIиссар, ирсирая ирсирайн най.
АбрикI Къянчиев,
ш. Ккул
