[dropcap]У[/dropcap]ттигъанну ттун макIра ккавккуна ттула Вихьуллал шяраваллил Хъун хIатталлил чIарав яхъанахъисса кIивайва инсантурал нувщи бугьан кIива парча хIатталлил аьрщарал гъайкуну. На ттухьва: «Вагь, вайксса ишла къадуллалисса хъуру лагма дунура, циван гъайувкуривав хIатталу?» — куссия. Яла, суалданун жаваб лякъин, хъирив хьуну лавгссияв шяраву яхъанахъисса, кьулгьу-кьуран кIулсса ца хъуначуначIан.
На ганахь цIувххуссия: «БучIиссарив, хIатталу гъайкуну, гикку нувщи бугьан?» — куну. Ганал, мисалдаран ца луттирал цIагу кIицI дурну, бучIишиву бувсуна. Му лахIзалий на чантI увкунав. Цаппара гьантрава га хъуначу ттуна бакIрайн агьайхту, на ганахь бувсъссия ттунна ккарксса макI. «Хъиншиврун хьуннав, амма хIатталлив хъуру дугьланнив къабучIиссар», — куна.
Ва иш ттун бавхIуну чIалан бивкIуна ттула дакIнива къабуклакисса, зунттал инсантал хъуру дугьлай ччай бушаврил умудрацIун.
Ккуллал райондалийн Ххувшаврил кьини хьунадакьин увкIун ивкIсса хIурмат лавайсса Адамов АьвдурахIманнул райондалул жяматрахь Ххувшаврил кьини барча дуллалисса цала ихтилатрал ялун ххи бувна: «Зунттал кIану – му шяраваллил давурттал кIанур. Ятту ябаву бакъагу, хъуругу дугьлан аьркинссар. Ший зун ччисса инсантал бакъар тIисса хаварду щялусса хавардур. Зу, ший яхъанахъисса инсантал, яла Ватан дуруччин ччимиру. ЦIуну увчIусса райондалул бакIчинал лагма лавгун, цаннай ца бавкьуну зун аьркинссару: СПК ца чулий, жямат гамур чулий, шяраваллал администрация тамур чулий бушиву ттун кIулли. Умуд бур цIусса райондалул бакIчинал, вай кувнничIан кув кIункIу бувну, райондалий ца барачат ххишаласса бишин бан бюхъанссар тIисса», — куну. Валлагь, ми махъру ттула зумату зевххуни кунмасса бия.
Яла къащисса иш ци бур учирча, жула шяраваллаву бур инттухунмай Хъарас щаврил байранну дуллай: дукай, хIачIай, къавтIун бизай, балайрду учай, спортрал бяст-ччаллу бувай. Амма цаягу инсаннан дакIнийн къабагьай, шяраваллил администрациялийн аьрза чивчуну, ттун хъу дугьан ччай бурча, аьрщарал парча була учин.
Уттигъанну ккурчIав хьунабавкьусса инсантурал ттухьхьун буллуна суал: «Ци дахханашиву хъанай дур цIусса райондалул каялувчи увчIуну махъ?» — куну. Муданмагу инсантал ялугьлан бикIай цIусса дахханашивурттах. Гьай-гьай, ми цирдагу ччан дикIай ххуйшиврул чулийннайми. Амма ттухьхьунма буллусса суалданун дуллуссия на укунсса жаваб: «Бурги, цуми дунугу, дахханашивуртту ца инсаннаща дуван къашайссар. Ми дахханашивуртту дуллан аьркинссару жува. Мисалдаран, ятту-гъаттара ябуллай, миннуя дучIаймур дахлай, маэшат ххишала хьун буллай. Му чIумал бучIиссар хIукуматрая жунна аьркинмур тIалав дуллангу. КкурчIавгу щябивкIун, жун ва аьркинни, та аьркинни тIий, хаварду бусласаву – му яла бигьамур зат бур», — куну.
ХIажимурад ХIусайнов
