[dropcap]Г[/dropcap]ьунар бусса чичу, хIакин, тарихчи, художник, публицист Мариян Ибрагьимовал 100 шинал юбилейрайн 15 том дунияллийн буккаву – му Дагъусттаннал,Ккавкказуллал агьалинан хъуннасса ххаришивур.
[dropcap]М[/dropcap]и томругу итабавкьуну бур Аьрасатнаву ца хьхьичIунсса луттирду итабакьай идаралул, «Белый город» тIисса. Ва Аьрасатнал ХIукуматрал тIалавшин дусса луттирду итабакьайсса идарар, федерал министртуран, цаймигу хъуни къуллугъчитуран, кьатIаллил билаятирттаясса машгьурсса инсантуран пишкаш бувайсса, исвагьисса луттирду ва альбомру итабакьайсса. Гьамин ва идаралул Мариян Ибрагьимовал луттирду итабакьавугу тIайлабацIулунсса ишри.
[dropcap]М[/dropcap]оскавлив, ЯтIул Майданнив, май зурул 31-нний хьусса Мариян Ибрагьимовал луттирдал презентациягу дайдирхьуна «Белый город» идаралул директор Константин Чеченёвлул барча буваврил мукъуйну. Ванал кIицI бувна гьар шинах шайсса щалвагу Аьрасатнал луттирду итабакьай идарарттал дянивсса конкурсрай Марияннул томру итабакьаврин яла лахъмур кьимат бивщушиву.
Имам Шамиллул цIа зумух ласун къадагъа дусса заманнайва, Мариян хъинну гъирарай датIлай бивкIун бур имам Шамиллул цIаницIун дархIусса тарихийсса материаллу. Имамнал оьрмулиясса чичрурду му личIи-личIисса кIанттурдай ядуллай бивкIун бур. КIицI лавгсса роман итабакьаву – му Марияннул инсан хIисаврайсса ва чичу хIисаврайсса гьунарди. Мунил сивсуну бувсса захIмат, чувшиврий бувтсса оьрму хIисавравун лавсун, ва лу «Жизнь замечательных людей» сериялувугу итабакьин лайкьссар», — тIий ур профессор МахIаммад Аьбдулхабиров.
Бюхттулсса кьимат бишлай бур Мариян Ибрагьимовал творчествалун Беларуснал чичу Елена Стельмахгу: « Марияннул язи бувгьусса ххуллу – агьалинаха къуллугърай бувтсса оьрмулул ххуллу бур. Марияннуву кIива авурсса ва къирият дусса халкьуннал оь хIала хьуну бур: виричусса зунттал халкьуннал ва алвагьсса оьруснал дворяннал».
ДакIнийн бутанну Дагъусттаннал халкьуннал шаэр Фазу Аьлиевал Марияннуя увкумургу: « Мариян Ибрагьимова – бюхттулсса чичур. ТачIав щилчIав уттинин къачивчуссар ва чичиншиву къакIулли имам Шамиллуя ванил кунмасса произведение».
[dropcap]Р[/dropcap]асул ХIамзатовлулгу Мариян Ибрагьимовал «Имам Шамил» роман Ккавкказуллал дяъвилиясса ва имам Шамиллуясса яла ххуймур лур увкуну бур.
Укун бюхттулсса цIардан лайкь хьусса чичу машгьурну бивкIун бур ххаллилсса хIакин хIисаврайгу. Буниялттунгу, Марияннул тачIав хIакиннал пиша къакьабивтун бур. Лажин кIялану хIакиннал даву дуллалаврицIун, Марияннул чIявусса луттирду чичинсса чIунгу ляркъуну дур. Ванил захIмат ххирашиву ччима хIайран хьунсса дур. АцIния ряхва томрайсса захIматрал хIасиллугу ккаккиялун дирхьунни «ЯтIул майданнив».
ДакI дарцIуну учин бюхъанссар, Марияннул арс Рустам Ибрагьимовгу, ниттил аманатрайн хиянат къавхьуну, адаврай къуццу тIутIисса арс ур куну. Мариян Ибрагьимовал канихчичрурду аякьалий ядурну, ми дунияллийн дуккан дуваврихлугу жува Рустамлуйн барчаллагьрай бикIан аьркинссару.
ПатIимат Рамазанова
