[dropcap]А[/dropcap]ьрасатнал цинярда регионнайсса школарттай июнь зурул 4-нний дуллунни тарихрал ва химиялул ЕГЭ-рду. Дагъусттаннай 3536 выпускникнал буллуну бия тарихрал ва 3370 выпускникнал химиялул ЕГЭ-рду дулунсса аьрзри. Экзаменну хьунни 55 пунктрай.
[dropcap]Т[/dropcap]арихрал экзаменну дуллалиминнан ккаккан дурну дия 25 даву 3 ссят ва 55 минутIрай дуван. Химиялул 10 даву даврингу ккаккан дурну дия 3 ссят ва 55 минутI. Тарихрал экзамендалул ласун ккаккан бувсса яла лагьмур бал бия 32, химиялул – 36. ХьхьичIми шиннардий ЕГЭ-рду дуллай бивкIминнал бусаврийн бувну, яла захIматми экзаменну дур тарихрал ва химиялул.
— Экзаменнайн хIадур хъанай ивкIсса дуклаки оьрчIан къакIулсса, ягу захIматсса цичIар дакъассар. Гьалак къаувккун, паракьат хьуну, экзамендалухух лавгун, аьркинссар цанма кIулмур чичин. Ялунгума ххуйну бикIай, экзамен дуллалийни, цучIав ахкъавчуну, даврихух лаган итаву, — тIий, дакIнийн бутлай ур 2017 шинал химиялул экзамендалул 86 балл лавсъсса, И. М. Сеченовлул цIанийсса МГМУ-лул студент Шагьабуттин Муртазялиев.
— Жу кьянкьану ялув бавцIуну буссару, ЕГЭ-рду сакин даврил ва экзаменнай низам лиян дурсса ишру хьун къабитаву мурадрай, — увкунни ДР-лул кIулшивуртту дулаврил министр Уммупазил Оьмаровал.
Вице-премьернал хIукмулийн бувну, республикалул КIулшивуртту дулаврил министерствалий хIасул бувну бусса бур ЕГЭ-дал хIасиллу дуллалисса аттестациялул Координациялул совет.
Имара Саидова
