[dropcap]Б[/dropcap]услай ур Расул Абакаров: — Архсса билаятрай (Дагъусттаннай), лахъва-лахъсса зунттаву (дянивну 2600 метралул хьхьирияр лахъну) дуссар хьхьичIарасса шяравалу ЦIувкIул. Яхъанайгу буссар тикку сивсусса инсантал – лак.
Жул ппухълу аьвзалзаманнайва яхъанай бивкIун бур зунттаву. Зунттаву ламурду бухьунссар яла аьркин шайми затру. Мигу, туну, биялсса къабикIайхьунссия. ЦIувкIуллал агьалинан кьакьардал ялтту архъан дахIин лавхьхьуну бур, ва бакIуя та бакIуйн лахъаваншиврул. Укун хIасул хьуну дур пагьламаншиву. На агьлу- авладрай пагьламантурал ххюйлчинмур никиравассара. Ххюра ник ттунна ххуйну кIулмири, миннайн бияннингу бивкIссарив пагьламантал къакIулли. КIулли ттулва ппухълу хъатIайх, байраннайх буклай бивкIшиву, цавувасса гьунарду ккаккан буллай, хаснува Дянивмур Азиянаву. Буттал кIанттул цIанийсса дяъви байбишиннинма ЦIувкIратусса мукьа жагьил, мукьа дус, Киеврал циркравун багьну бур. КIия аьрая зана къавхьуну ур.
[dropcap]Л[/dropcap]ивчIун бур Ярагъи ХIажикьурбанов ва Рабадан Абакаров. Миннаяту байбивхьуну бур циркирал династиярдугу. Циняв ттул гъан-маччами, ттаттахъул, буттауссурвал пагьламантал бур. Щаллагу дунияллийсса циркирдаву гьунарду ккаккан буллай бивкIссар ми.
[pullquote]Петербурглив увсса, хъуна хьусса гьаркас куна, нагу Дворцововый ламу кIибизлазисса лахIзардайн тIайлаацIайвав. ЦIана архъан диркIссания, ва зумания та зуманийн дархIуну, пагьламан лахъантIиссия тIун икIайссияв ттухьва нава.[/pullquote]
Ттул буттал ппу 1969 шинал Ленинградрал мюзик-холлданувун артистну зун увххун ур. Ттул ппугу кьура шинай тава мюзик-холлдануву зий уссия. Нагу увссара ва хъуна хьуссара Питердай. Цаппара шиннардий зий ивкIра тава мюзик- холлдануву, яла циркраву, театрдануву, утти, тархъансса артист хIисаврай, оьвкунийн лагара.
— Зу кунмасса кулпатирттаву оьрчIру бувайхтува, яъни аццавува, хьхьуттай бацIан бувайхьунссар?
— Аьрщарайх занан лахьхьайхтува хьхьуттай авцIуссара учирчагу, тIайлассар. Профессионал хIисаврайрив на гастрольлайх уклай айивхьуссара 13 шинал оьрмулуву. ДакIний бур, буттал нава, кIулши шайхтува, тренировкарттайн занази уллай, ацIансса мугьлат къабивкIшиву. Чурххал цIуллусса, итххявхсса хьуншиврул чIаванийва увтунав спортрахун. Хьхьуттай ацIан увнав 7-8 шинаву, мяйжанссар му ппурттуву хьхьуттай ччан бивкIмур буван къаитайвав. Дакъая ихтияр. Так ацIайссияв хьхьуттай. Буттал шару ласун, цичIав дуван къаитайвав, мунал учайва: «АцIу. Агар вин хьхьуттай кьянкьану ацIан лахьхьирча, аьрщарай ххуйну дан шаймур яла вища хьхьуттайгу даван хьунтIиссар». Ва ттун оьрмулуву ва давриву хъинну дучIи ляркъусса дарсри. Пикри барча, хьхьуттайх лахъавриву личIисса захIматшиву дакъассар. ЗахIматссар хьхьуттай ца кIанай авцIуну икIан, аьрщарай куна.
— Цумур пиша язи бугьан хъиннивав тIий, буруккинттарайгу акъахьунссияв?
— ОьрчIний цамур затрахун машхул хьунсса чара бакъассия. Ттун чIалай бия ппу зузисса куц. Ттухьгу буттал кьянкьану увкуна: «На вин жулва ппухълуннал пиша лахьхьин буванна. Вин пагьламан лахъан кIулну бикIан аьркинссар, гихунмай артистнал пиша язи бугьангу, къабугьангу вила ишри. 
Пагьламаннал пишалул мудангу вин ччатI булунтIиссар».
На Культуралул университетраву дуклай уссияв, лахьхьав менеджментнал ва экономистнал касму. Шанна шинал хьхьичI Москавлив ивзра, зий ура менеджерну, ттул интернет-ттучан бур. Пагьламаншиву къакьаритара, ва ттул хоббир кьаритан къашайсса, яла къалагайсса мякьри, ччатIмур цамур пишалий ляхълай ура. Ттул кIия арс ур, цаннан 4 шин дур, кIилчинманан 3 барз бур. Гьай-гьай, миннангу лахьхьин бувантIиссар на хьхьуттайх лахъан. Амма миннан пагьламантал хьун ччан бикIансса, къабикIансса къакIулли.
— Миннан хIакинтал хьун ччан бикIарча?
— На так ххарира хьунтIисса. Ттухь ппу мудангу цамур пиша язи бугьи тIун икIайва. Пикри барча, хьхьуттайх лахъаву – му нигьачIийсса даву дур, цIунцIия хьуну, мушакъат хьун бюхъайсса. Кувни ттухьва навагу икIара, ссан аьркинссар ттул арсурваврангу хьхьуттайх лахълан, мунийну ци духхинтIиссар тIий. Амма ттун ппухърунная ирсирай дирсса хьхьуттайх лахъаврил традиция дяличIан дуван ччай бакъар. Яла кьурчIи бизлазимургу му бурхха, утти пагьламантурал наслулия ца на акъа акъара. Цурда шяравалу яхьуну дур, агьали хъинну чан хьуну бур шяраву, хьхьуттайх лахъаврил магьирлугъгу духлагавай дур.
— Ина ура зулва пиша нигьачIийссар тIий. Хьхьуттая агьсса, цIунцIия хьусса ишругу хьуссарив?
— Ттун тIайлабацIу хьунуккар. Вари чинсса цIунцIия къархьунни. ТIайлассар, ччан гъавгъуна цал, мугу – футболданий уклай унува. Ци кIулли ттул тIайлабацIу хьхьуттайва ливчIссарив, футболданул тIуркIулул тIайлабацIу ливхъуна ттучIату. Та ппурттувура на машлухунгу агьсса. Ттун цIана 32 шин дур, бюхъай ттигу хьхьуттайх лахъаву «чулуха личай» оьрмулувун иян увану тIий, щавщи личIину асар хъанай къабикIангу. 
ДакIний бур буттал ппу, ччаннайн гуж бувтун тIий, аьрчча тIий ивкIсса, угьара шайхту, ппугу линкьа тIий ур. Цайми пагьламантурайхгу вара кьини дуккай. Микку тамаша бизансса цичIав бакъассар: цуксса гуж бутан багьлай бур чурххайн хьхьуттай, хIатта Нева неххал ялтту дархIусса архъандалий пагьламан къалахъарчагума, мукьра-ххюра метралул лахънийсса хьхьуттайх лахълахъаврилгу хIаллицIух зулмулул мугьру кьабитлай бакъарив чурххал базурдай. Ялагу ттухь цIухлан бикIай, лахъния нигьакъаусарав тIий. Циван нигьакъаусава, усара! Лахъния нигьакъабусайсса сагъ бакъасса инсанталли, гьармагу, бюхттулния ялавай урувгукун, нигьаусайссар. Нара ва даву дуван аьркинссар тIий, ттулла дакI хьунмур буллан икIара,чурххава нигь дукканшиврул. Инсаннан вас-ццах дакIнива буккан буван лахьлан багьлагьиссар. Зува пикри бувара, агар ина ца квадратный метра дусса столданий бацIан буварча, стол хъунмасса бухьувкун, ина сивсуну бацIантIиссара. Агар му стол муруллул ягу къатрал зуманив бивхьуну лахъарча, нигьал тIайланувагу бацIан къахъанантIиссар, стол цава-ца бухьурчагу. Хьхьуттайх лахъайнийгу яла захIмат-жапамур зат – нярал, психологиялул хIадуршиннар.
— Буттал вин мукун цукун хIадур хьун аьркинссаривгу лахьхьин бувайвав?
— Ттун лахъшивруянияр буттая нигь дикIайва, мунияту лахъайссияв хьхьуттайнгу, ачайссияв.
— Нева неххал ялтту, Дворцовый ламул хъаттирдайх, пагьламан лахъансса пикри цукун багьуна?
— На ччянива мунил хияллай уссияв. Петербурглив увсса, хъуна хьусса гьаркас куна, нагу Дворцовый ламу кIибизлазисса лахIзардайн тIайлаацIайвав. ЦIана архъан диркIссания, ва зумания та зуманийн дархIуну, пагьламан лахъантIиссия тIун икIайссияв ттухьва нава. Ттулва хиял дустурахьгу бувсъссия. Смольнайлувусса ца совещаниялийн агьсса ттул дуснал вице-губернаторнахь бувсун бия, цала ца дуснал укунсса хиял бур куну. Танангу ттул пикри ххуй бивзун бия, Культуралул комитетрайн тапшур бувна ттул чIарав бацIан. На гужсса команда хIасул дурссия: альпинистал, каскадертал бавтIун. Техникалул бутIа буттал цайнма лавсуна, ттул мунайн ттуйннанияр вихшала дуссар. Нева неххайсса микI бассаннингу бавцIуну, репетициярду дуллай бивкIру, амма дагьайкунсса репетиция дурагу цалли дурсса.
Лахъну хьхьуттайх лахъаврил опыт буссар ттул, хIатта зунттайх пагьламан лахъаврилгума. 2016 шинал ттущал дусъсса Таус МахIачевал, хъунасса шаэр Расул ХIамзатовлул душнил душнил, ххуйсса проект хIасул дуруна. Художниктурал дирхьусса цаппара суратирттах (ми зия хъанай дия) къулагъас дуван баву мурадрай, ми ххассал даву мурадрай, Тауслун ччай бия на ми суратру, ца-цаних тIий, ца ххяллул зумания тамур зуманийн ххилай, магьирлугъ ядан аьркиншиврул лишан хIисаврай. Дурссия му даву.
Дворцовый ламуй тIурчарив, захIматшиву дия, ламул хъаттирду зунххисса дуну, архъан мюхчанну цIакь дуван багьлай бия. Ххюра минутIрал мутталий ламуйх пагьламан лахъан багьлай бия. На, марч буккарчагу, хIадурну икIансса куццуй лахьлай ивкIра. Нева неххал ххурххулулгу гилунай кIункIу уллалисса кунмасса асар бия, дахьа ша ласлай ачайхту, гилу щин дакъа чIалай дакъая, яла на, ламул тамур хъаттирах уруглай, та зума янил дургьуну авчура.
На дакI дарцIуну уссияв нава страховка дакъанува хьхьуттайх лахъантIишиврий. Амма шагьрулул властьрал миннат бувна, страховка дакъа малахъара, куну. Ттунгу тараза кIунттил бугьан багьуна, страховкагу дурну.
Елена Михина «Комсомольская правда»
Таржума бувссар ПатIимат Рамазановал
