[dropcap]М[/dropcap]айрал 30-нний ДР-лул БакIчинал кIанайма Владимир Васильевлул каялувшиврий хьунни республикалул калпушру ва газобетондалул блокру байсса предприятиярттал давуртту «ххютула» чаннайн дуккан даврил хIакъиравусса батIаву.
«Республикалийсса экономикалул хIакъираву экспертътурал личIи-личIину буслай бур: цаппара бур жула экономикалул «ххютулумур» бутIа хIисавну бур 40%, цаппара бур 60% хIисавну бур тIий. Аналитикалул справкалий чивчумунийн чул бищурча, республикалий зий бур 24 калпушру байсса завод, инсантал ялапар хъанахъисса къатрачIан гъанну. Миннул оьну лиян дуллай дур экология (лагмасса тIабиаьт), чIявусса газ ччучлай тIий. ЦIана шиккун бавтIун бур чIярусса шиннардий му давриха зузисса, законнайсса предприятиярттал каялувчитал, миннаща хьунссар тукунминнан конкуренция хьун дан.
Жу муданма буссару налогирттал органнайн ва ихтиярду дуруччай органнайн тапшур буллай бюджетравун налогру дучIан дайсса кIанттурду гьарза баву, му социал масъалагу бухьувкун», — увкунни Владимир Васильевлул.
Ванал бусаврийну, инвентаризация дайсса комиссиялул исват бувну бур цIанасса ппурттуву республикалий так 8 предприятие зий душиву стационар технологиялул кьай-кьуйлий, ливчIминнул лиян дуллай душиву экологиялул законну.
Вице-премьернал кIанайма ХIасан Идрисовлул бусаврийну, циняв ишбажаранчитал сияхIрайн ласун аьркинну бур строительствалул багьа сакин шаврил информациялул системалий.
