[dropcap]И[/dropcap]юнь зурул 1-нний АьФ-лул ПаччахIлугърал Думалул депутат Аьвдулмажид МахIрамовлул кьамул бунни агьали.
Имара Саидова
Цалчин депутатнал кьамул увсса Каспийск шагьрулий ялапар хъанахъисса Назим Аьлиевлул мурад бия цIуну бувсса душ анаварсса мутталий азарханалий уттубишин бан кумаг бува тIисса. МахIрамовлул, Республикалул оьрчIал азарханалул хъунама хIакин Сиражуттин МахIачевлуйн оьвкуну, тIалав бунни ванал масъала дузал баву. Назим Аьлиевлул душ гава кьини азарханалийн кьамул бувну, багьайсса кумаграл щаллу бунни.
[dropcap]М[/dropcap]ахIачкъалалив ялапар хъанахъисса ХIусманова Мадина аьрзирай бувкIун бия, Комарова кIичIиравусса тагьар хъинну лащинсса душиву, кьакьарду дагьсса кIичIиртту бакьин къабуллай тамансса шинну хьушиву буслай. Депутатнал, ва масъалалул хIакъираву шагьрулул администрациялул хъунаманал хъиривчу Мурад Аьлиевлуйн оьвкуну, кIул бунни ва кIичIиравалу ххуллурду бакьин баврил программалул лагрулул сияхIрай бушиву.
Депутатнал мукунма кьамул бунни уква багьайсса даруртту ласаврил, даврил щаллу баврил ва къатта-къушлил шартIру къулай даврил ва цаймигу масъаларттал хIакъиравусса кумагру тIалав буллалисса агьали.
Цинявппагу цачIанма бувкIсса агьалинал масъаларттал хIакъираву ккавккунни маслихIатру ва цала кумагчитурайн тапшур бунни ми щаллу баврил ялув бацIаву.
