[dropcap]В[/dropcap]а нюжмардий «Дагестанская правда» кказитрал редакциялий хьунни уттигъанну Къазахъисттаннал Актау шагьрулия зана хьусса хъамаллуращалсса хьунабакьаву.

З. АьбдурахIманова
Къазахъисттаннайн вай лавгун бивкIссар тайннал оьвкуну, Актау шагьрулун 55 шин ва тиккусса «Дагъусттан» Этнокультуралул центрданун 20 шин хъанахъисса шадлугъирттай гьурттушинна дан.

Делегациялувух ДР-лул Миллатирттал политикалул министерствалул чулуха гьуртту хьуну ур миллатирттал дянивсса арардал ва граждан обществалул управлениялул хъунама ГъазимахIаммад ХIажиев, ДР-лул Культуралул министерствалул чулуха Ккавкказуллал таржумалул къатлул хъунама Марат ХIажиев, ДГТУ-лул чулуха дизайнрал кафедралул хъунмур, художник-ювелир Асият Парамазова, РАН ДНЦ-лул Геотермиялул масъалар­ттал институтрал чулуха Саид Ниналалов ва ДГУ-лул пресс-службалул хъунмур Жамилат Ибрагьимова. Вайннащал мукунма бивкIун бур Даггосфилармониялул чулухасса Дагъусттаннал лайкь хьусса балайчитал Диляра Надирова ва Умайра Шяъбановагу.
«Дагъусттан» этнокультуралул центрданул хъунама Юсуп Шахшаевлул оьвкуну, Москавлия мукунма бувкIун бур Аьрасатнал Чичултрал союзрал секретарь Сергей Соколкин ва «Аьрасатнал кIяла кьурукьру» проектрал хъунама Евгений Макаровгу.

— Актау шагьру бур къундалул кIанайсса шагьру. Тикку ахъулссаннул ва ахънилссаннул тIалавшингу хъуннасса дур. Шагьрулул хъунаманащал хьусса ихтилатравугу жу чIурчIав дуллай бивкIру Дагъусттан Республикалул ва Актаулул дянив паром бан багьлагьишиврий. Мува кьини жуйн оьвкуна шагьрулул 23-мур школалийн. Тикку бия дагъусттаннал миллатирттал мазру лахьлахьисса «алхIаткьинилул школа» сакин бувну. ТаничIава сакин бувну бия «Къазахъисттаннал миллатирттал оьрчIансса Ассамблеягу», — буслай ия журналистътурахь ГъазимахIаммад ХIажиев.

Аьрххилул лагрулий ДР-лул Культуралул министерствалул чулуха школалул директорнан ва Да­гъусттаннал миллатирттал мазурдил дарсру дихьлахьисса учительтуран грамотартту ва барчаллагьрал ча­гъарду буллуну бур.
Майрал 18-нний хьуну бур «Дагестан» Этнокультуралул центрданун 20 шин ва Актау шагьрулун 55 шин хъана­хъаврин хас бувсса агьаммур мажлис. Му тIивтIуну бур Марат ХIажиевлул «Зунзул чани» тIисса суратирттал выставкалийну. Цила чIюлушиннарду ккаккан дурну дур художник-заргал Асият Парамазовалгу, Оьргърал заргалтал Нарман ва Аьли-ХIажи Хурдаевхъал каних дурсса хъусгу.

«Дагестан» этнокультуралул центрданул хъунама Юсуп Шахшаевлун ДР-лул ХIукуматрал чулуха­сса бахшиш ва барчаллагьрал ча­гъар буллуну бур ГъазимахIаммад ХIажиевлул.
Хьуну дур яла жула шихасса балайчиталгу гьурттусса концерт.
Вайннал бусаврийну, цуппа Актау шагьругу, аьмну тайннал билаятгу бусса бия ишбажаранчишиврух, инвестициярттах хъуннасса къулагъас дуллалисса, ххуй-ххуйсса къатри, идарартту буллалисса, халкьуннал оьрмулул даража лахъ бавриха зузисса.