Полициялул къайгъурдая

[dropcap]Д[/dropcap]агъусттаннал Виваллил иширттал министерствалул къатраву хьунни министрнал хъиривчу, полициялул генерал-майор Сергей Карповлул пресс-конференция.

Андриана Аьбдуллаева
Мунал журналистуращал­сса хьунаакьаврил хъунмур мурад бавхIусса бия Дагъусттаннай нанисса лачIун буккаврил Европанал чемпионатрацIун ва майрал байраннацIун. Бувсунни вай спортрал ва байрандалул мероприятияртту, низамрава къабувккун, аьркинсса куццуй гьаншиврул виваллил иширттал органнал зузалтрал дуллалисса давурттая.

Журналистурал суалла­хьхьун жавабру дуллай, ванал був­чIинбавуртту дунни ихтиярду дуруччай органнал Дарбантуллал райондалий бувсса операциялул хIакъиравугу. Ва операциялий 11 боевик бат увну ур. НАК-рал бусласимунийн бувну, миннава­сса кIия терактру дан хIадур хъанай ивкIун ур. Сергей Карповлул мукунма бувсунни Дагъусттаннал строительствалул, архитектуралул ва ЖКХ-лул министрну ивкIсса Ибрагьин Казибеков чув уссарив органнал кIул бувшиву, утти му чил билаятрая уцинсса чаран ляхълай бушиву.

«Викинг» ресторандалуву хьусса иширал хIакъираву ванал аьй ккарккунни ресторандалул къаралчинайгу, ярагъ ишла бувминнайгу.
— Ва ишираву оьрмулуцIа хьуну ур 40 шинавусса ресторандалул къаралчи. Къалмакъалдануву гьуртту хьуми циняв бувгьуну бур. Ми административ ва уголов жаваблувшиндарайн буцинтIиссар, — увкунни Сергей Карповлул.