[dropcap]А[/dropcap]прель зурул 18-нний Ккуллал райондалул администрациялул залданувун бавтIун бия цаппара лавайми классирттаву дуклакисса оьрчIру. Ва хьунабакьаву хас дурну дия апрель зурул 21-нний ккаккан дурсса «КIанттал цала сакиншинна» тIисса кьинилун.

Ккуллал райондалул администрациялул иширтталсса бувайсса Юсуп Исякьовлул кIицI бувуна:
— Ва кьини хъанахъиссар циняв инсантуран хасъсса байранну. Циван учирча, «КIанттал цала сакиншинна» хъанай дуну тIий властьрал инсантурачIан яла гъанмур бутIану. Ванийн хъар хъанахъиссар Аьрасатнал гражданиннан ххуйну яхъанан­сса хIалурду хIасул дуваву ва социал ва экономикалул ишру дузал баву, — куну.

Райондалул бакIчинал хъиривчу МахIаммад Чариновлул оьрчIру кIул бувна райондалул администрациялул къуллу­гъирттащал ва бувсуна миннайн цукунсса давуртту хъар хъанай дуссарив.
ОьрчIащал ихтилат бувна мукунма райондалул администрациялул жагьилтурал ва туризмалул иширттал ялув авцIусса пишакар Аьбдуллаев Абуссупияннул. Ванал оьрчIахь бувсуна райондалийсса волонтертурал даврия, маслихIат бувна оьрчIахь му сакиншиндаравун буххан, кIицI лавгуна, миву гьуртту хъанахъисса чIумал, оьрчIан кIул хъанантIишиву инсантурал ахIвал-хIал, гайннал буруккинтту.
Хьунабакьаврил ахирданий оьрчIан ккаккан бувна администрациялул зузалтрал кабинетру ва кIул бувна гайннал давурттащал.