[dropcap]А[/dropcap]прель зурул 23-нний ЦIуминалийсса Чапаевкаллал шяраву­сса «Солнышко» садикрал оьрчIащал хьунавкьунни ДР-лул Халкьуннал Мажлисрал депутат Амирхан Амирханов.

[dropcap]В[/dropcap]а увкIун ия, оьрчIан планеталия ва бургъил системалия кIулшивуртту дулаву мурадрай, садикрайн Мобил планетарий лавсун. Музыкалул залдануву лахъан бувну бия 5 метра лагрулул ва 3 метра лахъшиврул дусса къуппа (купол). Мюрщи тамашачитал, махIаттал хьуну, буруглай бия ккурккисса планеталуха лавхьхьусса цIансса шарданух.

ОьрчIал ца лахIзалий сайр бунни караматсса ва ляличIисса астрономиялул дунияллийх. Мукунма оьрчIахь балжину бувсунни бургъил системалул планетарттая ва цалчин Аьламравун левхсса космонавтътурая. ОьрчIаща гъанну ккаккан бювхъунни баргъ, галактика, космосрал караматру, цIурттал ххурххуппартту ва ттуруллал хъархъаллу. Мюрщултрал сайр бунни кометалущал, кIул хьунни вайннан Аьрщарал бува­гу бусса ца спутникрая.

Ца лахIзалий оьрчIан ккавккунни цIурттал дурцIусса ссав, планетардал кьюкьа ва аьсса ххуллу. Му бакъассагу, оьрчIахь бувсунни аьрщарай оьрму загьир хьу­сса куц, хьхьирирдал чIанулусса дунияллия ва ущу-щулгъилуя, жанавартрая. Дунияллул караматирттая бусласисса планетарийлия рязину ливчIунни оьрчIру ва миннал нину-ппу.
ОьрчIан дурсса ва ххаллил­сса бахшишрахлу садикрал тарбиячитурал ва нитти-буттал барчаллагь увкунни депутатнахь.