Тамашачитурал хьхьичIун бувккунни Т. Мурадовлул цIа­нийсса Дагъусттаннал па­ччахI­лугърал филармониялул цIусса ансамбль – трио: Амина Гунашева (фортепиано), Оксана Пинкус (скрипка), Анна Швец (виолончель). Коллектив уттинингьуртту хьунни Культуралул министерствалул дуллали­сса проектирдавух. Уттигъанну тIурча, вайннал цалчинсса цаллалусса концерт ккаккан дунни МахIачкъала шагьрулул оьрчIал искусствалул 1-мур школалий.
Амина Гунашева бур жулва лакку душ, Шахьуйннал шяравасса.

* * *
Республикалул Халкьуннал творчествалул къатлуву хьунни видеотворчествалийн багьай­сса ирглийсса семинар. Мунивух гьуртту хьунни республикалул районнал ва шагьрурдал аслий­сса культуралул центрдаясса, информациялул къуллу­гъирттаясса ва телестудиярдаясса 24 инсан. Ва проект щаллу дуллалиссар «Радуга» цIанилусса конкурсрал лагрулий.
Семинар бачин бувну бия цIа дурксса журналистътал: «Да­гъусттан» ГТРК-лул директорнал хъиривчу Ссалам Хавчаев, телевидениялул режиссертал Саида Оьмарова ва Игорь Кантемиров.

* * *
Дагъусттан Республикалул ПаччахIлугърал халкьуннал инструментирттал оркестрданул кIицI ларгунни 80 шинал юбилей. Му иширан хасну Къумукьнал театрдануву ккаккан дунни концерт.

* * *
Дагъусттаннаясса душ Эльвира ЯхIияева НТВ каналданул «Ты супер!» тIисса проектрал финалданувун бувккунни.

* * *
Дагъусттаннаясса кIия дуклаки оьрчI щалагу Аьрасатнал «Сагъсса классика» тIисса конкурсрал полуфиналданийн бувккунни. Конкурс хьуссар «Артек» лагерданий. Москавлив хьунтIисса финалданий назмурду ккалаккисса оьрчIал гьунардан кьимат бишлашиминнавух бикIантIиссар ГИТИС-рал ректор Григорий Заславский, Аьрасатнал халкьуннал артист Андрей Соколов, театрданул ва кинорал актриса Елена Захарова ва цаймигу машгьурсса инсантал.
ХIадур бувссар
Бадрижамал Аьлиевал