АьФ-лул культуралул лайкь хьусса зузала, ДР-лул искусствалул лайкь хьусса ишккакку, «Дагъусттаннал вирдакI» тIисса премиялул лауреат Мазагьиб Шариповлул чивчусса балайрдал республикалул магьирлугъ хьхьичIуннай ва авадан дурссар. Композиторнал творчествалунсса яла бюхттулмур кьиматнугу хъанахъиссар хIакьинусса кьинигу республикалул цинявппагу мазурдий ванал макьаннайсса балайрду тIийнма бушиву.

---

Имара Саидова
ДукIу ноябрь зурул 28-нний Оьруснал театрдануву хьу­ссия Мазагьиб Шариповлул юбилейран хас дурсса концерт. Шариповлул макьаннах, балайрдах мякь бувккун бивкIсса халкь хъунмасса хIаллай та концертрал биян бувсса асардая буслай, хъамакъаритавай бивкIунни. Тамашачитурал тава­къюрдайн бувну, Мазагьиблул балайрдал концерт тикрал дунни май зурул 11-нний МахIачкъалалив Яруссаннал театрдануву.
Мажлис бачин бувну ия Да­гъусттаннал халкьуннал артист Аслан МахIаммадов. Концерт дайдирхьуна МахIаммад-Загьид Аминовлул Дагъусттаннаха чивчусса хорданий учайсса балайлийну.

Цинявппа ва концертрай гьур­тту хьусса балайчиталгу бия цаннаяр ца гьунар бусса: Загьидат Муслимова, Арслан Шагьмандаров, Амрит ХIусайнаев, Илияс МахIаммадов, Нурианна Каллаева, Карин Кьадинаев, Шагьалай МахIаммадова, Муъминат Юсупова, Зоя Гудова, Аьбдул Мурадов, Ямлихан ХIажиев, Жамиля Аьбдуллаева.

Тамашачитуран ляличIину ххуй бивзунни концертирттавух чIявуну гьуртту къашайсса, амма ххаллил­сса балайчитал – Израил Мирзаев ва МахIаммад Къапланов. Концертрай, лак бакъасса, цайми миллатирттал артистъталгу бия – Рукьият ХIамзатова, Наира РахIманова, Даниэл Гьарунов.
ДакIний личIансса балайрду увкунни хъунмасса хIаллай сахIналийн къабуклай бивкIсса жула гьунар бусса балайчи Тамара Закарьяевал.