«Дипломированный тямада»

[dropcap]К[/dropcap]ъабигьасса ва муницIун цала хIарачатрайну ва захIматрайну оьр­мулул ххуллу лайкьну бивтсса инсан ур Зубаир. Ниттил лякьлуву унува, ппугу дунияллия лавгун, кIанттуву ахIлахIисса арсгу кьаивтун,цаппара хIаллава нинугу ахиратрал хьу­сса кьинилия байбивхьуну бур ванал кьисматрал жуж.

Ми диркIун дур 1927-28 шинну. Буттал лажин къаккаккарчагу, мунал цIа дирзсса Зубаир ниттирссу Мисил хъуна увну ур. Ванаяр хъунисса кIия уссу, Айгун, ТIалхIат, ва ссу, Аьйшатгу, уссур­ссуннал, лагма лавгун, бакI буккан бувну бур.

Кумав 4, Ккурклив 7 класс къуртал бувну бур ванал. Ми диркIун дур дяъви нанисса, халкьуннан аьзав-аькьувасса шинну. Оьрмулул 14 шинавусса Зубаирдунгу, дуккавугу кьадиртун, Каспийскалий дяъвилул ярагъ буллалисса заводрай зун багьну бур. Зий ивкIун ур мукуна МахIачкъалаллал портрай слесарьну ва шупирнугу. 1950-55 шиннардий аьрали буржгу лавхъун, шупирну зий унува хьхьувай дуклай, 10 класс къуртал бувну бур. Яла, заочнайну дуклай, Москавуллал машинартту бай институтгу къуртал бувну, инженер-механикнал пишакарнал диплом лавсун бур. Дуклай уна, Зубаир автопредприятиялул хъунаманал хъиривчуну зий ивкIун ур.

Ва къуллугърай зузиссаксса хIаллай цащава бан бюхъайсса кумагру байсса бивкIун бур ванал цала Кумиял ва цаймигу лакрал колхозирттан: машинарттан аьркинсса запчастьру лякъин, ми анаварсса мутталий бакьин бан.
1978 шинал Зубаирдул къуртал бувну бур Марксизмалул ва Ленинизмалул университет. Цува чув зурчагу, чув дукларчагу, жяматийсса давурттавух чялишну гьур­тту шайсса ивкIун ур. Пенсиялийн укканцIа Зубаир автокомбинат­рал коммерциялул директорну зий ивкIун ур. Лайкь хьуну ур чIярусса бахшиширттан, хIурматрал грамотарттан ва медаллан.

ЗахIматрая нигьакъаувсун, бу­сса оьрму зий-занай бувтсса чув Кумав цIанихсса Айгунхъал тухумрая уккав­рийгу цичIав махIатталшиву дакъар. Ва тухумрая бивзун бур чIявусса дурккучутал, ишбажаранчитал ва гьунар бусса пишакартал. Вай бивкIун бур щарнил жямат­рангу хъинбаларду бан хъамакъабитайсса, хъу-лухччив дусса инсантал, заллухъру.
Кумиял шяраву Зубаирдуйн учайсса бур «дипломированный тямада» куну. Зубаирдул лакку зумуну цIу буну бачин бувсса хъатIив ттигу халкьуннаву тIааьнсса асардащал дакIнийн бичлайнма бикIайсса бур. Зубаир музыкалул, балайлул ва шеъриятрал инсангу усса ур. Ванан цала яла ххирама шаэр Оьмар Хайямлул чIявусса шеърирду дакIних кIулну бур. Ххирар ванан лакралми шаэртурал шеърирдугу, цалагу чичайсса бивкIун бур шеърилул ххару.

ХIурмат лавайсса Зубаир! Цинявппагу ина кIулми, вил гъан-маччами ва щалагу Кумиял щарнил агьлу, вил хъуннасса юбилейгу барча дуллай, чIа тIий бур вин вания гихуннайгу рахIатсса оьрмулул шинну.

Залму АьбдурахIманова