[dropcap]Г[/dropcap]ьантлия гьантлийн лаглай бухьурчагу жула дянива Буттал КIанттул цIанийсса Хъун дяъвилул ветерантал, хьхьара хъанай бакъар аьрасатлувтурал дакIурдиву дяъвилул хIасратрал къювулул ваххувшаврил пахрулул асарду. Ягин хъанай дур ялун-ялун Ххувшаврил байрандалул агьамшиву.

---

Гьарца шинал кунна, хъинну яргсса ва чIюлусса Парад хьунни гьашинугу Лакрал хъуншагьрулий Гъумук. Зунзулчаннащалва лагма-ялтту чIюхлай байбивхьуна дяъвилул шиннардил балайрду. Гъумучиял паччахIххуллу чIюлу бувну бия щархъава тIутIащал ва шардащал нанисса дуклаки оьрчIал дас­ттардал. Шиная шинайн чIяву хъанай бур Парадрайн аьрали янналуву буклакисса оьрчIру-душру, хIатта ниттихъал кIунттихьсса вилттили оьрчIругума.

Миллатрал лаххиялуву­сса бурт­тигьалт хьхьичIну, дяъвилун бувсса кумаграхлу СССР-данул паччахIлугърал обороналул комитетрал райондалухьхьун буллуну бивкIсса ЯтIул Ттугълищал ва зюннав-дачIулущал Парадрал кьюкьа дуркIуна дяъвилия зана къавхьуминнан дацIан дурсса гьайкалданучIан. ЛяваличIину итталун дагьлай дия гьашину муний цалчин гьуртту хьусса, исвагьисса лаххиялувусса ЧIава аьралуннал дастта, «Юная армия» тIисса щалагу Аьрасатнал жагьилтурал су­ккушиндарал гьурттучитал. Вайннахь бия Ххувшаврил Ттугъгу, Совет Союзрал Вирттал АхIмад-Хан Султаннул, Ризван Сулаймановлул, ХIажи Бугъановлул, Якьув Сулаймановлул, ЦIаххуй Маккаевлул суратругу. Вайми дуклаки оьрчIахь дия дяъвилий талай бивкIсса цала ттатта­хъал суратру, транспорантру, тIутIив.

Парадрай гьуртту хьунни райондалул бакIдургьуми, идарарттал хъуними, шяраваллал бакIчитал, интеллигенция, магьирлугърал зузалт. Ххувшаврил кьини лахъа-хъун дан Кисловодскалия, мудана куна, увкIун ия Аьлил АхIмадов, Дагъус­ттаннал шяраваллил хозяйствалул академиялул преподаватель Аслан Къажлаев, миллатрайн багьайсса цавагу иширал чIарах къабуккай­сса Гулшан Хасаева ва чIявусса цаймигу хъамал.
Парад тIитIлай, махъ лавхъуна райондалул бакIчи Юсуп МахIам­мадовлул.

— Лакрал райондалия аьрайн лавгун ур 6000 чув, миннава 1500 – цала хушрай. 3200 ливчIун ур дяъвилул цIараву. ЧIивисса лакрал миллатрава увккун ур 6 Совет Созрал Виричу. Щалла дунияллун машгьур хьуссар 1-мур ЦIувкIуллал шяраватусса АхIмад-Хан Султан. Дяъвилул шиннардий ва ряхттуршлий кIийла гьаз хьуну ур ссавнийн, гьуртту хьуну ур 150 гьаваллавусса талатавриву. Ххит дурну дур цалалу 30 ва цайми летчиктуращалгу 19 душманнал самолетру. Махъра-махъсса самолет ххит дурну дур Берлиннай. Жула райондалия шамуннал лавсун бур Виричунал цIуку – Ризван Сулаймановлул, ХIажи Бугъановлул ва Якьув Сулаймановлул.
Дяъвилул шиннардий дяъвилул къинттуллух талай диркIсса 6200-нниха лирчусса партизантурал кьюкьраву гьуртту хьуну бур чIявусса дагъусттанлувталгу. Ми­кку дурсса виричушивурттахлу жула райондалиясса Ссунгъур Акаев хьуну ур Польшанал лараймур ордендалул кавалер.
Гъурбатрай, кIанттул патриотътуращал хъачIрай хъачI дирхьуну талай бивкIссар Читтуратусса ХIасан-ХIусайн Камалов – Италиянал Виричу, Ххюлусмату­сса ХIусайн Кущаев – Франциянал Виричу.

Дяъвилун бувсса кумаграхлу Лакрал район лув-ялув мукьилла лайкь хьуссар СССР-данул Сов­наркомрал чулухасса Занази ЯтIул Ттугълин ва лув-ялув шамийлва – ПаччахIлугърал обороналул комитетрал чулухасса Занази ЯтIул Ттугълин ва му абадлий ливчIссар райондалухьва. Вана хIакьинугу му Ттугъ жулла шадлугъ чIюлу дуллай, — куна цала мукъуву райондалул бакIчинал.

Дяъвилия зана къавхьуминнал рухIирдаяту кьулгьу-алхIам був­ккуна райондалул имам Шайхмурад ХIажимурадовлул. КIирагу райондалул аьрали комиссар ХIасан Масуевлул бувсуна Хъун дяъвилий Лакрал райондалул чиваркIуннал дурсса гьурттушиндарая ва виричушивурттая. Ихтилатру бувна ялагу райондалул Хъунисриннал совет­рал хъунама Даниял Магьдиевлул, ГьунчIукьатIрал школалул директор Малик Къушиевлул ва м. ц.
Муния махъ магьирлугърал къатлул зузалтрал ккаккан дуруна ххаллилсса концерт, хьуна спортрал тIуркIурду, дучри ххяххан баву.