[dropcap]Л[/dropcap]аргсса итникьини жучIан, «Илчилул» редакциялийн, був­кIун бия «Дараччи» клубрал хъунмур Мариян Илиясовал урчIакану бивкIсса меценат, ишбажаранчи Гульшан Хасаевагу, Марияннул душ Динара Маммаевагу.

---

П. Рамазанова
[dropcap]Л[/dropcap]акрал миллатгу, миллатрал мазгу, культурагу, цIа-кьинигу ядаврил цIаний хъуннасса хъар ларсун най бивкIсса «Дараччи» клубрал даву, Мариян дунияллия лагайхту, дяличIан къаритан, утти му давриха зунтIиссар, лакрал уздансса инсанталгу лагма лаган бувну, Рамазаннул душ Гульшан Хасаева.

— Мариян Илиясова личIи­ссава инсан бия. Мунил сакиншинначинал гьунаргу, инсантал цичIанма кIункIу буллалисса тIилисингу бия. Ттуща, Марияннуща кунма, паргалну къахьунссар. Амма ттувугу, Марияннуву кунма, миллат­рал ялувсса мива буруккинтту бур, дакIцIуцIаву дур, хияллу, мурадругу жул цакуцссая. Ттуйнна ва даву вихшала дурнавхьур, нагу хIарачат булланна сантирай, бюхъулий «Дараччилул» даву гихуннайгу нани дан, Занналгу кабавкьуну, — увкунни Гульшаннул.

Динара Маммаевал бувсу­нни цуппагу чялишну хIала буххавантIишиву «Дараччилул» цинявппагу иширттавух, мурадирттавух.
«Илчилул» коллектив кунма, щалвагу миллат ххари хьун­тIишиврий дакI дарцIуну бур — Гульшан Хасаева «Дараччи­лул» хъунмурну битаврия. Ха­варба­къулийрив къакIулли, Гьун­чIу­кьатIув Марияннул буттал къатрай мунил цIа чирчусса ула лачI­лачIисса кьинигума тIайла дарцIуну дия Гульшан бувсса кьинилийн. Духьунссар ванивугу аьш, ца лишан.
Ххари хьухьунссар тIий буру Марияннул рухIгу, цилла ларсун най бивкIсса хъар Гульшаннул цийнна ларсун тIий.
Гульшаннунгу ва цинявппа «Дараччилул» душваврангу чIа тIий буру тIайлабацIуртту.
«Илчигу» зул чIарав буссар мудан!