«Ттул Ватан – Дагъусттан»

[dropcap]М[/dropcap]артрал 12-нний «Дагестан» РИА-лий дагъусттаннал журналистикалуву бусравсса кIану бувгьусса ТIалхIат АхIмадхановлул «Ттул Ватан – Дагъусттан» («Моя дагестанская Родина») тIисса цIусса луттирал презентация хьунни.
Залму АьбдурахIманова
[dropcap]Ш[/dropcap]иккун бавтIун бия элмулул, культуралул, литературалул, журналистикалул арардаву зузими ва вузирдал студентътал. Луттирал авторнал ва «Дагестан» басмаханалул каялувчи ОьмархIусман ХIажиевлул хъамаллурахь бувсунни лу итабакьин савав хьусса тарихрая.

-ТIалхIатлул бувтун бур хъинну ххуйсса, цанма язи бувгьусса пишалуха зузисса, гъирарайсса оьр­му. Ванаща бювхъунугу бур цавува ляличIисса Дагъусттан салкьи бан. Лу бищун хьхьичI ларсун увкIсса ванал чичрурду на ккалайгу ивкIра, къаиздатель хIисаврайча, хIадурсса луттирал букку куна, — кунни Оь. ХIажиевлул.

Авторнал хIазсса, буккин гъира бутлатисса хавардацIун лу авадан бувну бур шиву ишла дурсса чIярусса суратиртталгу. ЧIяруми суратирттал автор Камил Чутуевлул кIицI лавгунни цанма хъинну тIааьнну бушиву цалла цIагу, суратругу, миннуцIун буттал рирщуми суратругу луттираву душиву ва ТIалхIат АхIмадхановлул буккулт­ран ххуйра-ххуйсса бахшиш дуршиву.

Дагъусттаннал Журналистътурал союзрал хъунама Аьли Камаловлулгу цала ихтилатраву кIицI лавгунни луттирал авторнал ва лу итабакьин дакIнийн багьсса ОьмархIусман ХIажиевлул хъуннасса даву дуршиву.
— На лу буккав хъунмасса гъирарай. Канил бугьансса мугьлат бакъа, ссихIир бувсса куна, авторнал хияллал чуннив увцуну лявкъура. Шиккунгу увкIра ТIалхIатлухь барчаллагь учин. Мяйжаннугу, дакIнихтунусса ххуйсса махъ учин жува анавар буклан буру, яла чIал хьуну къалякъин, — увкунни ванал.

Барчаллагьрал махъру мукунма лавхъунни Миллатирттал ассоциациялул хъунама Зикрулла Илиясовлул, «Зунттал хъами» журналданул жаваблувсса секретарь Аьжа АьбдурахIмановал, «Дагестанская правда» кказитрал хъунмур редактор Бурлият Токбулатовал, ДГУ-лул кафедралул хъунама Мусттапа Билаловлул ва цайминнал.

Шиккува кIицI лаган, луттирал автор хъанахъиссар цIа ларгсса журналист ва публицист. ЛичIи-личIисса шиннардий зий ивкIссар «Коммунист» тIисса Буйнакскаллал литературалул кказитрай, «Комсомолец Дагестана» кказит­рал жаваблувсса секретарьну, телевидениялий, «Советский Дагестан» журналданул отделданул редакторну. Мукуна зий ивкIун ур «Новое дело», «Время, Право, Мы» тIисса кказитирттайгу. Пенсиялийн уккан хьхьичI зий ивкIссар «Дагестан» тIисса художествалул ва публицистикалул журналданул хъунама редакторну.

Лу цалсса бахлантIиссар «Арбат» ттучандалий ва Издательствалул цалчинмур зивулий луттирду бахлахисса жанахIраву. Ялун нанисса Европанал лачIунбуккултрал чемпионатгу хIисавравун ларсун, ОьмархIусман ХIажиевлул кIицI лавгунни шагьрулул патирдаву, аэропортрай, вокзалданий ва спорткомплексрай ваницIун Дагъусттаннал тарих, культура ва багьу-бизу ккаккан буллали­сса цаймигу цIусса лу­ттирду бахлансса икьраллу дуллай сукку хьуну бушиву.