[dropcap]В[/dropcap]ладимир Васильев, ДР-лул хъунаманал кIанайма: Владимир Путиннул дур цанна хасъсса хасият, цала увкумур иширайну дузрайн буккан къабувну къабитайсса.

На хъунма­сса гъирарай ялугьлангу ивкIра му рисалалух. Жула Президентнал цала хьхьичI бивхьусса мурадругу бур билаятрал кьуват цIакь баврил ва агьалинал ахIвал-хIал къулай баврил цIанийсса. Ва рисала тIайла дуккан хьхьичIгу, Президентнал бувсса хIукмулийн бувну, ттун багьунни Дагъусттан Республикалул каялувшиву даву бакIрайн ласун. Дагъусттаннайн тIайла уклакийни Владимир Путиннул ттухь бувсуна, шикку ххишала бакъа захIмат ххирасса, гьунар ххисса, чумартсса, ххаллилсса инсантал ялапар хъанай бушиву. Президентнал личIинува миннат бувна Дагъусттаннал халкьуннал ахIвал-хIал къулай бавриха зузаву. На барчаллагьрай ура, ши­кку зий хъун хIал къавхьуну бунагу, ларгсса шинал ахирданий Аьрасатнал Президентнал Дагъусттаннан кумагран 4 миллиард арцул итабакьаврихлу.

Аьвдулмажид МахIрамов, АьФ-лул ПаччахIлугърал Думалул депутат:
Президентнал рисала ккала­ккисса мажлисрай гьуртту хьунни ПаччахIлугърал Думалул депутатътал ва сенатортал, Конституциялул, Верховный ва Высший арбитражный судирттал вакилтал, Хъунмур прокуратуралул бакIчи, ЦИК-рал председатель, Аьрасатнал Жяматийсса палаталул вакилтал, Аьрасатнал ва чил билаятирттал СМИ-лул журналистал.
Президентнал ккаккан дурну дур Аьрасатнал виваллил ва кьатIаллил цIурувкьюсса масъалартту щаллу баврийнсса план. Рисала дия куртIсса пикрирду бусса, гьарца иширая хавар бусса. Президентнал хьхьичIун лавсун бия миллатирттан хасъсса масъаларттугу. Гьарица инсаннал цала къуллугърал бурж дакI марцIну би­ттур булларчанни жула билаятрал кьуват гужлан хьунтIисса. Ва хъанай бур рисалалул агьаммур мурадгу. Мукунма рисалалуву бур АьФ-лул аьрали-космосрал гужру хьхьичIунмай баврин хас був­сса бутIа. Муниву бур Аьрасатнал паччахIлугърал ва цайми билаятирттал мурадру буруччаву кIицI лавгун.
«Агьалинал ахIвал-хIал хьхьи­чIунмай баврил яла цIакьмур гьану жула цашиврулли бизлази­сса»,- тIисса куртIсса мяъна ду­сса му­къурттийну къуртал дунни Президентнал цалла рисала.

Юрий Левицкий, АьФ-лул ПаччахIлугърал Думалул депутат:
Аьрасатнал Президентнал сантирайн дуртун дунни уттининсса даврил хIасиллу ва хьхьичI бивхьунни цалчин щаллу бан аьркинсса масъалартту. Рисалалий гьаз бувсса масъалартту бур цинявппагу агьалинал оьрмулун хасъсса. Президентнал кIицI лавгсса яла агьаммур мурад агьалинал оьрмурду буруччаву ва миннал багьу-бизу къулай баву бур. Мукунма рисалалуву кIицI лавгунни Аьрасат хьхьичIунсса экономика дусса 5 хIукуматрал сияхIрайн лахъан бан аьркиншиву. Президентнал хъуннасса къулагъас дурну дур демографиялул, пенсиярттал, кIулшивуртту дулаврил ва экологиялул масъаларттах.ЛичIиссара къулагъасрайн лавсун бур билаятрал оборона цIакь даврил ма­съалартту. Президентнал мукунма кIицI лавгунни вай масъалартту дузал баврийн хъар хъанахъишиву хIукуматрал бучIантIимур.

Камил Давдиев, ДР-лул Халкьуннал Мажлисрал председательнал хъиривчу:
Гьашину Президентнал дур­сса рисала уттинин дурминнува ца яла гужмур ва агьаммур хьунни.
Президентнал тIалав бунни ряхра шинал мутталий, мискинминнал аьдад чан дурну, халкьуннал доходру, пенсияртту гьаз баврил ялув бацIан.
Хъинну ххуй бивзунни документрай хъуннасса къулагъас миллат буруччаврих дурну душивугу. 2000 шиная шихунмай дянивну Аьрасатнал агьалинал оьрмулул шинну дур 63-ннива 73-ннийн дияннинсса. ЦIанасса жула хьхьичI бивхьусса мурад хъанай бур 2030 шинайн бияннин дянивну агьалинал оьрму 80 шинайн биян бан­сса хIарачат баву. Шанна шинал мутталий хIасул бантIиссар 270 азара оьрчI яслирдавун кьамул увансса кIантту, 7%-райн диян дувантIиссар ипотекалул кредит.
«Справедливая Россия» партиялул вакил хIисаврай, ттун къулай бивзунни, жул партиялулгу хьхьичIун лавсъсса, гьарца шяраваллаву фельдшер-акушернал пункт­ру тIитIин був­сса хIукмурдугу.
Ттул пикрилий, гьарицагу да­гъусттанлувнан къулай бизлазисса зат бур жула бюджет кIилий гьаз баву. Гьарицагу ишбажаранчинан каши диял хьунсса 6,5 % бусса кредитру ласаву.
ХIадур бувссар
Имара Саидовал