Дагъусттаннал БакIчинал кIанайма Владимир Васильевлул ва «Фонд содействия реформированию ЖКХ» тIисса паччахIлугърал корпорациялул Наблюдатель советрал председатель Сергей Степашиннул бувсунни юрухъ аьрххилий учIаврил давурттал хIасиллая.
[dropcap]С[/dropcap]ергей Степашиннул бувсунни инсантал кугьна хьусса, лекьаврия нигьачIаву дусса къатрава бизан баврил проект дузрайн дуккан даврил ххуллий хьусса захIматшивурттая: «Дагъусттаннал формальну кугьна хьусса къатрава инсантал бизан баврил программа биттур дарчагу, яни бизан бансса къатри дарчагу, хIакьинусса кьинигу цIуну дурсса къатравун 1300 инсан ттигу къаивзун ур».
Сергей Степашиннул бусаврийн бувну мунил сававрттуну хъанай дур цIуну дурсса къатри шагьрулул дязанная архну душаву ва инфраструктура дакъашиву. «Хаснува МахIачкъалалив: оьрчIал сад бувну къуртал бан бувар, школа бакъар, транспорт занай дакъар. Инсантуран тиккун бизан ччай бакъар. Дарбантливсса къатрал диялдакъашивурттаву чIяруми дур къатри ххуйну къадурну душаву.
Республикалул Строительствалул министерствалул цалва хьхьичI бавцIуну бивкIсса масъалартту ххуйну бартбивгьуну бакъар. Ми масъаларттал хIакъираву жучIан бувкIунни 200 аьрза. Инсантуращал хIала-гьуртту хьун аьркинссар, миннан бувчIин буллан аьркинссар къатригу бакIуйн дуккан дантIишиву, аьркинсса шартIругу дузал дантIишиву», — увкунни Сергей Степашиннул.
Мунал бусаврийн бувну, Фондрал зузалт мартрал 5-нния шинмай зунтIиссар Дагъусттаннай, гьашину ссуттилва циняв 1300 инсан цIусса къатравун бизаву мурадрай.
Яла зун тIий бур цIусса программа дузрайн дуккан давриха. Владимир Васильевлул бувсунни му программалул агьамшиврия.
— Аьркинссар цIусса къатравун бизан, цанчирча мукунсса бази цалли шайсса. Аьркинни ми къатравун бизансса шартIру дузал дуван, инсантуран бувчIин буван цIусса къатравун бизан аьркиншиву, духми къатри лекьан дан чIун хьуну духьувкун, цайми къатри бансса кIанттурдугу къаливчIун бухьувкун, — увкунни республикалул каялувчинал.
