[dropcap]Ш[/dropcap]иная шинайн сийлувун дагьлай дур ЦIуссалакрал райондалий душваврал дянивсса волейболданул турнир. Гьашину ва турнирданий гьуртту хьун ччисса командартту чIяру хьунни. Мунияту ттуплий буккаврил бяст-ччаллу буллай байбивхьунни ЦIуминалийсса ЦIуссачIурттащиял шяраву ва райцентрданий – ЦIуссалакрал 1-мур школалий.
ЦIуссачIурттащиял школалий шадлугърал даражалий тIиртIунни райондалул 9-гу шяравасса командартту гьуртту хъанахъисса турнир.
Турнир дайдихьлай, командартту барча дуллалисса ихтилатру бунни ЦIуссалакрал райондалул бакIчинал хъиривчу ХIажи ХIажиевлул, 1-мур ДЮСШ-рал директор Сергей Аьлимовлул, райондалул жагьилтурал политикалул иширттаха зузисса пишакар МахIач Акаевлул, шяраваллал администратортурал ва школардал директортурал.
Командарттал дянивсса финалданувун багьансса бяст-ччал ягинсса хьунни.
ЦIуминалийсса командарттал дянив цалчинсса кIантту бувгьунни ЦIуссачIурттащиял школалул, кIилчинмур кIану – Аьхъардал школалул, шамилчинмур – Чапаевкаллал школалул.
ЦIуссалакрал 1-мур школалий хьумур турнирданий ххув хьунни ЦIуссачIурттащиял 2-мур школалул команда. КIилчинмургу, шамилчинмургу кIанттурду бувгьунни 1-мур ЦIуссалакрал школалул командарттал. Ххув хьусса командарттан ЦIуссалакрал райондалул администрациялул чулуха буллунни кубокру, дипломру ва волейболданул ттупру.
Икьрал дурну, ххув хьусса командартту хьунадакьинтIиссар супер-финалданий.
ХIадур бувссар
Имара Саидовал
