[dropcap]К[/dropcap]Iира шинал хьхьичI апрель зурул 5-нний бувксса Аьрасатнал Президентнал хIукмулийну сакин бувну бур Аьрасатнал национал гвардиялул аьралуннал федерал къуллугъ. Аьрасатнал национал гвардиялул аьралуннал кьинину тIурча, 2017 шинал январь зурул 16-нний бувксса хIукмулийну цIакь дурну дур март зурул 27-сса кьини.

---

Андриана Аьбдуллаева
[dropcap]В[/dropcap]а кьини Дагъусттаннал Росгвардиялул управлениялул лахъа-хъунну кIицI ларгунни пишалул байран. Байрандалийн бувкIун бия ведомствалул зузалт, миннал кулпатру, оьрчIру, къуллугърал ветерантал.

Шикку гьурттушинна дан оьв­куну бия республикалул гужирдал структурарттал вакилтурайн, Аьрасатнал Виричу Ма­хIаммад НурбахIандовлул ппу НурбахIандлуйн. Ярославуллал шагьрулия бувкIун бия 1999 шинал Къадардал даралуву жанну дуллусса ОМОН-лул аьралитурал нинухъру – Нина Серова ва Надежда Сныткина.

Каспийскалий 2-мур ОМОН-лул базалул хIаятравун ккаккиялун дуккан дурну дия Национал гвардиялул гуж-цIакь ккаккан буллалисса, бронетранспортердая вертолетирттайн дияннин­сса, аьрали техника ва ярагъ.

Байрандалийн бувкIминнал хьхьичI Росгвардиялул аьралитурал ккаккан дунни тахсиркар угьлагьисса, ширишилун бувгьуми тархъан буллалисса ва пIякь учаву хьу­сса чIумал ци зун, цукун занакьулу хъанан аьркинссарив.
Биту-ххиту, каруннай биявур­тту, – вай ишру мяйжаннугу хъанахъисса кунма чIалай бия. Хъиннува тамаша бизансса иш бия гьаваллавун гьаз хьусса аьрали вертолетрая «душманнайн» пулеметрал цIу дишаву.

Аьралитурал цала къуллугърал бигарду ккаккан буллалисса хIаятравусса тамаша къуртал хьуну махъ цинявппа бавтIуна конференц-залданувун. Шикку къуллугърал зузалт ва ветерантал барча буллалисса ихтилат бувна управлениялул хъунама, генерал-майор МахIаммад Баачиловлул.
— Национал гвардиялул аьралуннал агьаммур бурж паччахI­лугъралгу, жяматралгу мюхчаншиву дузал давур, инсаннал ихтиярду ва тархъаншиву дуруччавур.

Жу хIарачат буллай буру жула къуллугърал бурж дакI марцIну, лавайсса даражалий бартбигьин. Дагъусттаннал Национал гвардиялул зузалтраву чансса ба­къассар бюхттулсса паччахIлугърал наградарттан лайкь хьусса. Аьрасатнал Виричунал цIа ларсъссар арула зузалал, миннава ххюннал – аьпа­лул хьуну махъ, ЯтIул цIукул орден ларсун дур ца инсаннал. Къучагъшиврул орден – 59 зузалал. Къуллугърал бурж биттур буллай жанну дуллуну дур 152 зузалал.

ХIакьину жул аьралитурал зул хьхьичI ккаккан дурмур – вай жул гьарица кьинисса къайгъурдур, — увкунни МахIаммад Баачиловлул.

Хъирив ихтилатру бувна респуб­ликалул гужирдал структурардал вакилтурал. Къуллугърал бурж би­ттур буллай жанну дуллусса аьралитурал аьпалун минутIрайсса пахъ багьавугу дуруна.

Ахирданий давриву хьхьичIун ливчусса зузалтран бахшишру дуллуна. Байрандалул мажлисрайн авадансса концертрал программа хIадур дурну диркIнугу, му кка­ккан къадунни Кемероволий хьу­сса ­оьсса балаллуцIун бавхIуну.