Дагъусттаннал паччахIлугърал медициналул университет ялу-ялун гьарта-гьарза дуллай бур уртакьшиврийсса зузаврил дазурду. Вана уттигъаннугу хьунни дазул кьатIатусса уртакьтуращалсса хьунабакьаву – ва ххуллух ДГМУ-луву хьунабавкьунни Кубанал вакилтуращал.

Бадрижамал Аьлиева
Дагъусттаннал паччахIлугъ­рал медициналул университет­рал администрациялул корпусраву Херардо Баррера Плано (SMС Russia (СМСИ Рус) компаниялул дунияллул халкьуннащалсса хIала-гьурттушиврул директор) ва Филипп Баррера Плано (мура компаниялул гендиректор) хьунабавкьунни ДГМУ-лул ректор Маммаев Сулайманнул.
Хьунабакьаврий ялагу гьур­тту хьунни Москавуллал цIуллу-сагъшиву дуруччаврил департаментрал шагьрулул 22-мур поликлиникалул менеджер, «Кубинское здравоохранение в Москве» проектрал каялувчи Сергей Смолькин, шагьрулул 3-мур азарханалул хъун хIакиннал хъиривчу Оксана Раджабова, ДГМУ-лул элмулул проректор Наида Моллаева, ДГМУ-лул отделданул начальникнал хъиривчу Сажид Хажалиев.
Муниннин хьхьичI кьини хъамал бивну бия МахIачкъала шагьрулул медициналул цаппарасса идарарттайн, миннувух – ДГМУ-лул базану хъанахъисса 3-мур азарханалийнгу.
Хъамаллурал хьхьичI махъ лахълай, Сулайман Маммаевлул кIицI лавгунни цивппа ххарину бушиву вай цачIава кьамул буван.
— Жул вузрал яла хьхьарамур звено хъанай бур жува заллу­сса клиникалул база бакъашиву. Му, ца жул бакъасса, Аьрасатнал чIявусса цаймигу медициналул вузирдал щаллу къавхьу­сса масъала хъанай бур. Мукун­сса базарду бур анжагъ цаппара­сса центральный вузирдал. Му масъала щаллу къавхьуссаксса, жул давриву хьунадакьланссар цаппарасса захIматшивуртту. ХIарачат буллай буру республикалул медициналул идарарттал хъуними хIакинтуращал ца­сса маз ляхълан, ми цивппагу чIявуми бур ДГМУ-лул кафед­рардал хъуними.
ЧIал къавхьуну Дагъусттаннайн бучIан най бур Аьрасатнал язими хIакинтурая сакин хьусса группа. Миннащалсса хьунабакьавурттай жу тавакъю буван ччай буру цания-ца азархана вузрал оператив каялувшиндаралун булун. Му чIумал жуща бюхъантIиссар му клиникалул шартIирдай жулва студентътурал кIулшивуртту цIакь дуллан. Хъунмасса умуд бур жул сипталул чIарав Дагъус­ттаннал цIусса каялувшиннагу дацIанссар тIисса, — увкунни Сулайман Маммаевлул.
Ректорнал хъамаллурахь мукунма бувсунни университетрая, мунил коллективрая, ларгсса шинал 85 шинал юбилей кIицI ларгсса вузрал тарихрая.
Кубанавасса хIакин-ней­рохирург, медициналул элмурдал доктор Херардо Баррера Планол бувсунни цува Дагъус­ттаннайн хьхьичIа-хьхьичI увкIун ушиву, муниннин цанма бавшиву шикку 40-нния ливчусса миллатру ялапар хъанай бушиву, бувсунни, республика ххал дувансса чIун дакъанугу, цивппа бивми кIанттурдая.
— Лахъисса хIаллайсса блокадалух къабурувгун, Кубанаща бювхъунни хьхьичIунмай бачин. Жун бувчIлай бия жучIара тIабиаьтрал луртанну дакъашиву ва жулва билаятрал агьаммур аваданшиву, ресурс инсантал бушиву. Мунияту Фидель Кастрол агьаммур гуж тIайла бувна инсантал дуккин баврийн ва му ххуллийхчIин билаятгу тIутIайх бичин баврийн. Ттул ниттил кIулшивуртту ларсъссар Германнаву, хьуссар академик, профессор, Кубалий нейрохирургиялул школалул гьану бивзмур. Нагу, ттул чIунархIалмигу, личIи-личIисса билаятирттай (Аьрасатнаву, Италиянаву, Испаниянаву) кIулшивурттугу ларсун, зана хьуру ватандалийн. Мунил хIасилнугу хьунни хIакьинусса кьини бушиву Кубанал бакъа итакъабакьлакьисса цаппарасса препаратру. Аьрасатнаву да­къар мукунсса царагу продукт, Американаву – ца ягу кIира. Кубанаву тIурча – азарунния ливчусса препаратру. Жу хъунмур къулагъас дуллай буру профилактикалулмур медициналух, яла хъин шаврин хъунна­сса чIун харж къадулланшиврул. Дагъусттаннайнсса аьрххилий жу ххал бигьарду цаппара­сса къашайшивурттайн багьайсса масъалартту. Жул маслихIатру зул итталу хъанай бухьурча, жу хIадурссару зущал уртакьну зун, — увкунни ванал.
Хьунабакьаврий ДГМУ-лул ва SMС Russia компаниялул дянивсса зузаврил кьутIигу дурунни.